Me ftesë të Kryetarit të Këshillit të Bashkësisë Islame të Podujevës, Bekim ef. Jashari, ditën e shtunë, më 16 qershor 2012, Myftiu i Shkodrës Imam Muhamed Sytari, ka zhvilluar një vizitë në Podujevë.
           
Fillimisht Myftiu ka vizituar selinë e Bashkësisë Islame të Podujevës, ku është pritur nga Kryetari i K.B.Islame, Bekim ef. Jashari me pjesëtarët e tjerë të stafit të tij. Gjatë bisedës së ngrohtë, mikpritësi i ka uruar mirëseardhjen në Podujevë Myftiut të Shkodrës. Ai ka theksuar se kjo është një ditë e veçantë për Këshillin e Bashkësisë Islame të Podujevës dhe një mundësi më shumë për të shtuar bashkëpunimet e ndërsjellëta dhe vizitat, sidomos në raste ditësh të shënuar fetare dhe tubimesh që mbledhin besimtarët.
           
Nga ana e tij, Myftiu i Shkodrës Imam Muhamed Sytari, ka shprehur kënaqësinë e tij për vizitën në Podujevë dhe ka konfirmuar dëshirën dhe vullnetin e tij për rritjen e bashkëpunimeve, në kuadër të afrimit dhe bashkimit të mëtejshëm të shqiptarëve nga të gjitha trevat e tyre, duke u dëshmuar si një popull i madh me vlera dhe tradita të pasura fetare dhe kombëtare.
           
Biseda ka vijuar rreth organizimit të dy institucioneve dhe këmbimit të eksperiencave në tubimet e ndryshme fetare, organizimin e jetës fetare në dy qytetet respektive etj.
           
Ndërkohë, për nder të kësaj vizite të Myftiut të Shkodrës, Këshilli i B.I. të Podujevës ka organizuar një tribunë fetare në xhaminë kryesore të Podujevës, “Met Podjeva”. Me qindra besimtarë të pranishëm kanë dëgjuar me vëmendje bisedën fetare të mbajtur nga Myftiu i Shkodrës Imam Muhamed Sytari. Gjatë saj, Myftiu ka folur mbi rëndësinë që ka mbikëqyrja e All-llahut në jetën e përditshme dhe kontrolli i brendshëm i zemrës duke e orientuar atë drejt dashurisë së All-llahut dhe vlerave të besimit. Myftiu është lutur edhe për shpirtrat e dëshmorëve të lirisë dhe mirëqenien e besimtarëve në Podujevë, Kosovë e përtej saj.
           
Pas faljes së namazit të mesditës, Mytiu i Shkodrës është përshëndetur me besimtarët e shumtë të Podujevës, me të cilët ka këmbyer edhe urime dhe lutje të shumta vëllazërore. Me këtë rast, Myftiu ka takuar edhe drejtues të ndryshëm fetarë të Podujevës, imamë dhe intelektualë të afirmuar të qytetit.
           
Ndërkohë, në orën 14.00, Këshilli i B.I. të Podujevës ka organizuar një takim përkujtimor me rastin e Natës së Madhe të Israsë dhe të Miraxhit, për drejtuesit dhe intelektualët e qytetit. Në këtë tubim ka marrë pjesë edhe zv/ministri i Shëndetësisë në Qeverinë e Kosovës, drejtuesit lokalë të Podujevës, drejtues të Gjykatës, Policisë, Shoqatës së Veteranëve të Luftës, imamë të xhamive të ndryshme, drejtues të partive politike etj. Të ftuar nderi në këtë aktivitet kanë qenë, Kryeimami i Bashkësisë Islame të Kosovës, Sabri ef. Bajgora dhe Myftiu i Shkodrës Imam Muhamed Sytari, të cilët kanë mbajtur edhe ligjëratat e rastit.
           
Gjatë referatit të tij para të pranishëmve, Myftiu i Shkodrës, ndër të tjera ka thënë: “Jam shumë i gëzuar që jam sot në mesin tuaj, në tokën e Zahir Pajazitit dhe dëshmorëve të lavdishëm të kombit tonë. Jam i emocionuar që shkel këtë tokë të begatuar nga gjaku i dëshmorëve, që janë krenari jo vetëm për ju, por për mbarë shqiptarët kudo që janë! Duhet ta falënderojmë All-llahun e madhëruar që erdhi kjo ditë e bekuar, ku ne të lëvizim lirshëm drejt qyteteve shqiptare dhe të takohemi në tubime të tilla me vlera fetare dhe kombëtare!”

Më pas, Myftiu është ndalur në pesë stacione, që i paraprijnë leximit të drejtë të ndodhisë së Israsë dhe të Miraxhit, ku ka dhënë edhe mesazhet e tij në lidhje me këtë ngjarje të shënuar në historinë e profetit Muhammed (a.s).           

Në përfundim të referatit, Myftiut të Shkodrës Imam Muhamed Sytari i është dorëzuar një “Mirënjohje” nga Këshilli i Bashkësisë Islame të Podujevës: “Për punën dhe kontributin e tij në fuqizimin e vlerave të besimit dhe çështjes kombëtare”.