Pasditën e së enjtes, më 14 qershor 2012, në ambientet e xhamisë së Parrucës, Myftinia Shkodër ka organizuar një tribunë fetare me rastin e përkujtimit të Natës së Madhe të Israsë dhe të Miraxhit.

Aktiviteti ka nisur me këndimin e një pjese nga ajetet e Kur’anit, nga imami i xhamisë Parrucë, teologu Durim Kasemi. Më pas teologu Arben Halluni ka prezantuar qëllimin e këtij organizimi duke theksuar se Nata e Madhe e Israsë dhe e Miraxhit është një datë e shënuar për mbarë muslimanët.

Ndërkohë, në fjalën e tij Myftiu i Shkodrës Imam Muhamed Sytari, ka vënë në dukje se Israja dhe Miraxhi është një thirrje e përhershme për çdo musliman, për t’u zgjuar nga hutimi dhe për të qenë prijës në shoqërinë ku jeton. Ai ka thënë se: “kushdo që përkujton Isranë dhe Miraxhin, duhet të ndjehet krenar për profetin e tij. Muslimanët duhet ta mbajnë kokën lart sepse profeti i tyre është Muhammedi (a.s), më i dashuri i Zotit të gjithësisë!”.

Aktiviteti ka vijuar me fjalën e rastit nga teologu Idmir Plaku, imam i xhamisë “Ebu Bekër”. Gjatë saj, ai ka shpjeguar rëndësinë që ka përkujtimi i kësaj nate, ndodhitë e së cilës janë përjetësuar edhe në Kur’an. Imami, ka bërë thirrje që kjo natë të zgjojë dashurinë dhe respektin më të madh për All-llahun dhe të dërguarin e Tij, në zemrat e besimtarëve.

Më pas, janë kënduar salavate me xhemat, në shenjë respekti dhe dashurie për të dërguarin e All-llahut, Hz. Muhammedin (a.s).

Për të dytin vit radhazi, Myftinia Shkodër ka zhvilluar edhe përzgjedhjen e 10 imamëve më të mirë të vitit. Këtë vit janë vlerësuar imamët:
 
1.      Ademir Xama, xhamia Bahçallek
2.      Altin Nikshiqi, xhamia Mes-Myselim
3.      Asllan Babaj, xhamia Mjedë
4.      Idmir Plaku, xhamia “Ebu Bekër”
5.      Ilir Dizdari, xhamia Bardhej
6.      Mithat Myftija, xhamia e Plumbit
7.      Ruzhdi Plangaj, xhamia Fshati i Ri
8.      Smajl Braqi, xhamia Domën
9.      Vehbi Dani, xhamia Muriqan
10.  Ylber Rupa, xhamia Zogaj
 
Gjatë përshëndetjes së tyre, imamët kanë shprehur mirënjohjen e tyre për Myftininë Shkodër dhe vlerësimin që i bëhet. Ata kanë falënderuar xhematet përkatëse për angazhimin e sinqertë dhe punën vëllazërore në shërbim të interesave të Thirrjes Islame.

Me shumë emocione, të pranishmit kanë ndjekur këtë ceremoni vlerësimi dhe janë përshëndetur me imamët e nderuar, duke i uruar mbarësi dhe suksese të mëtejshme.