Paraditën e së hënës, më 11 qershor 2012, Myftiu i Shkodrës Imam Muhamed Sytari ka pritur në një takim të përzemërt drejtorin e producionit në televizionin satelitor turk Canal A, Abdullah Türksoy, i shoqëruar edhe nga z. Nafis Lokvica, president i AAPV, Prizren.
           
Qëllimi i kësaj vizite ka qenë interesimi i televizionit turk për të zhvilluar një reportazh mbi jetën fetare islame dhe gjurmët e trashëgimisë islame në Shkodër.
           
Pasi i ka uruar mirëseardhjen në Shkodër, Myftiu i ka njohur miqtë me qytetin e Shkodrës, historinë e saj, përbërjen fetare, kulturore dhe zhvillimet e Thirrjes Islame në qytetin më të madh verior. Gjatë bashkëbisedimit, ndër të tjera Myftiu ka kërkuar vëmendjen e investitorëve bamirës nga Turqia për të mbështetur projektet e ndryshme të Myftinisë Shkodër dhe zhvillimin e vakëfeve të saj. Ai ka theksuar se kontributi i vakëfeve turke në Shqipëri është i madh, por do të ishte edhe më efikas sikur të dilte jashtë interesave të ngushta bamirëse të vakëfeve përkatëse.
           
Vizita ka vazhduar edhe te xhamia e Plumbit, te gjurmët e xhamisë së Qafës, te rrënojat e xhamisë së Tabakut, në kalanë Rozafa dhe në Muzeun Historik të Shkodrës.
           
Në një bashkëbisedim para kamerës së Canal A, Myftiu ka ftuar biznesmenët turq që të vijnë të vizitojnë Shkodrën dhe gjurmët islame të saj. Ai ka theksuar se lidhjet e vjetra historike kanë lënë gjurmët e veta në Shkodër, gjurmë që duhen rigjallëruar në mënyrë që historia mos të mbetet ashtu siç armiqtë e Shqipërisë e servirin akoma sot në librat e historisë.
           
Myftiu ka lobuar edhe për financimin e projektit për rehabilitimin e plotë të xhamisë së Plumbit dhe mbështetjen e tij, në mënyrë që të zgjidhen përfundimisht problemet e trashëguara dhe ato aktuale të këtij monumenti kulture me vlera të mëdha për Shkodrën dhe Shqipërinë.           

Vizitorët kanë shprehur kënaqësinë e tyre të madhe për këtë takim dhe vizitë në disa prej vendeve më të bukura të Shkodrës dhe kanë premtuar vazhdimin e komunikimit në shërbim të kërkesave të Myftinisë Shkodër.