Paraditën e së enjtes, më 7 qershor 2012, Myftiu i Shkodrës Imam Muhamed Sytari ka inspektuar nga afër punimet që po zhvillohen për rregullimin dhe rehabilitimin e plotë të zonës përreth gjurmëve të xhamisë së vjetër të Qafës.
           
I shoqëruar edhe nga pjesëtar të stafit të Myftinisë Shkodër, Myftiu ka vëzhguar nga afër punimet që po bëhen për rehabilitimin e plotë të kësaj zone. Myftiu është njoftuar se shumë shpejt përfundon faza e parë e punimeve brenda kuadratit të xhamisë së vjetër, fazë e cila pasohet nga sistemimi i lulishtes dhe ambienteve të tjera plotësuese të projektit.
           
Ditë pas dite, punimet po nxjerrin përherë e më shumë në pah bukurinë dhe gjurmët islame të kësaj zone historike të qytetit të Shkodrës.

Herë pas here, Myftinia Shkodër ka ngritur zërin për neglizhencën zyrtare ndaj kësaj zone, që frekuentohet shumë edhe nga turistë të huaj. Mjerisht, fare pak është bërë për infrastrukturën e kësaj zone. Megjithatë, Myftinia Shkodër ka lobuar dhe vazhdon të ngrejë zërin e saj për të tërhequr vëmendjen e pushtetit lokal dhe vendor ndaj vlerave të mëdha historike dhe kombëtare që lidhen me identitetin e Shkodrës dhe në veçanti të kësaj zone, dikur bajrak i parë i Shkodrës.