Paraditen e së mërkurës, më 6 qershor 2012, Myftiu i Shkodrës Imam Muhamed Sytari ka pritur në një takim pune Atasheun turk Z. Shaban Ishlek. Qëllimi i këtij takimi ka qenë çështja e ndërtimit të xhamisë së re në fshatin Barbullush.
           
Disa muaj më parë, z. Ishlek i ka dorëzuar Myftiut të Shkodrës projektin për xhaminë e re që Myftinia e Iskenderunit në Turqi ka planifikuar të ndërtojë në fshatin Barbullush në kuadër të bashkëpunimit dhe binjakëzimit me Myftininë e Shkodrës.
           
Tashmë, ditë pas dite po plotësohen të gjitha kushtet për ndërtimin e kësaj xhamie të re të shumëpritur, jo vetëm për besimtarët e fshatit Barbullush, por për krejt komunitetin. Siç dihet, ndërtesa aktuale e xhamisë në fshatin Barbullush është amortizuar dhe është në një gjendje shumë të keqe. Herë pas here besimtarët janë ankuar për këtë fakt dhe Myftinia Shkodër është interesuar për të ndërtuar një xhami të re.            

Gjatë takimit është diskutuar për procedurat që do të ndiqen për realizimin e plotë të këtij projekti që ka një vlerë shumë të madhe në kuadër të rehabilitimit dhe pasurimit të infrastrukturës së objekteve të kultit islam në Shkodër.