Paraditën e së martës, më 5 qershor 2012, Drejtori i Vakf-Investimeve në Komunitetin Mysliman të Shqipërisë, z. Uran Kalej, ka zhvilluar një takim pune në Myftininë Shkodër.

Fillimisht në zyrën e Myftiut, ai ka kërkuar të njihet me gjendjen aktuale të disa prej vakëfeve të rëndësishme të Myftinisë Shkodër. Më pas, i shoqëruar edhe nga Myftiu, menaxheri i pronave dhe administratori i Myftinisë, z. Kalej ka inspektuar në terren disa prej këtyre vakëfeve, si në Bahçallek, te Ura e Bunës dhe në Zogaj.

Gjatë këtyre inspektimeve, është njohur edhe me përpjekjet e Myftinisë Shkodër për të kthyer në vend të drejtat e saj në këto vakëfe, si dhe disa projekte të përgatitura për shfrytëzimin e tyre sa më efikas. Në këtë kontekst, është diskutuar edhe për projektin e ardhur në Myftininë e Shkodrës për ndërtimin e një xhamie të re te vakëfi, bri urës së vjetër të Bunës, si një domosdoshmëri për ringjalljen e gjurmëve të vjetra të xhamive në Shkodër dhe si një përgjigje për nevojat e banorëve muslimanë të kësaj zone.

Nga ana e tij, Drejtori i Vakf-Investimeve ka theksuar se këto vakëfe duhen shfrytëzuar maksimalisht dhe duhen gjetur mënyra për të tërhequr investime, në shërbim të zhvillimit të tyre. Ai ka dhënë edhe disa mendime dhe ide të vyera për mënyrat e zhvillimit të disa prej vakëfeve në Shkodër.