Paraditën e së enjtes, më 31 maj 2012, Myftinia Shkodër ka nisur punimet për rrethimin e territorit vakëf përreth xhamisë së fshatit Dragoç.  

I pranishëm në këtë ceremoni ka qenë edhe Myftiu i Shkodrës Imam Muhamed Sytari, i shoqëruar nga imami i xhamisë, z. Shkëlqim Sykja dhe pjesëtarë të stafit të Myftinisë Shkodër.
           
Fillimisht Myftiu ka falënderuar angazhimin e imamit dhe kërkesën e vazhdueshme të këshillit të xhamisë Dragoç për të realizuar rrethimin e pronës së vakëfit përreth xhamisë, që është zaptuar nga institucione dhe individë, në mënyrë flagrante. Ai ka falënderuar edhe të gjithë ata që i kanë dhuruar xhamisë tokë nga toka e tyre, duke u bërë një shembull përkushtimi dhe bamirësie edhe për të tjerët.           

Në momentin e hedhjes së gurit të themeleve, Myftiu është lutur për mbarësinë e kësaj pune dhe realizimin e saj me sukses. Njëkohësisht ka theksuar se Myftinia Shkodër është e vendosur të çojë në vend të drejtën e saj dhe kthimin e çdo vakëfi të sekuestruar padrejtësisht nga shteti në vitin 1967, a individë të papërgjegjshëm, pas viteve ’90.