Paraditën e së hënës, më 28 maj 2012, Myftinia Shkodër ka organizuar ceremoninë e hedhjes së themeleve për ndërtimin e xhamisë së re në fshatin Kuç. I pranishëm në këtë ceremoni, Myftiu i Shkodrës Imam Muhamed Sytari ka vlerësuar rëndësinë e ndërtimit të kësaj xhamie të re në një tokë të dhuruar për hir të All-llahut.

Ndër të tjera, Myftiu ka theksuar: “Është një kënaqësi e madhe të jemi sëbashku sot, në këtë tokë, të cilën baballarët tuaj ia falën Zotit dhe Zoti e begatoi këtë vend për nijetin e tyre. Nijeti i tyre, shpirti i tyre besimtar është sirri i kësaj mbarësie që na dha Zoti për të ardhur sot, për të hedhur themelet e xhamisë së re. Prandaj kujtoni baballarët tuaj dhe merrni nga shembulli i tyre. Shembulli i tyre është besimi, përkushtimi, devotshmëria, ruajtja dhe dashuria në rrugë të All-llahut”.
           
Më pas, të shoqëruar edhe nga tekbiret, Myftiu, imamët, kryeplaku i fshatit dhe besimtarët kanë kryer hedhjen e gurëve dhe lopatat e para në themelet e xhamisë së re.
           
Me shumë emocion, një i moshuar i fshatit, 85 vjeçari Sheuqet Brahja, ka shprehur gëzimin e tij për këtë moment duke thënë: “A ka gëzim më të madh për ne, katundi i Kuçit? All-llahu ekber!” dhe nëpërmjet tekbireve dhe lotëve të gëzimit ka bërë thirrje: “E gëzofshi o rinia e Kuçit, se unë nuk e di a e pres a nuk e pres xhaminë e re”.
           
Hedhja e themeleve për xhaminë e re ka qenë një sihariq i madh për krejt banorët e këtij fshati dhe një lajm i gëzueshëm, atmosfera e të cilit është përhapur gjithandej.           

Xhamia e re e Kuçit do të ngrihet mbi të njëjtin truall ku ekzistonte xhamia e vjetër e këtij fshati, e amortizuar dhe e e dalë jashtë përdorimi nga vjetërsia dhe përmbytjet e dy viteve të fundit.