Paraditën e së mërkures, më 23 maj 2012, Myftiu i Shkodrës Imam Muhamed Sytari ka pritur në një takim të përzemërt, Drejtorin e “Islamic Relief” Hollandë, z. Mostapha Bouchallikh, që shoqërohej edhe nga Drejtori i “Islamic Relief” Shqipëri, z. Muhammed El-Waei.
           
Gjatë takimit, Myftiu ka falënderuar mysafirin për vizitën dhe i ka uruar qëndrim të këndshëm në Shkodër e Shqipëri. Myftiu e ka njohur z. Bouchallikh me historinë e Islamit në trojet shqiptare dhe veçanërisht në Shkodër. Ka theksuar se feja islame është pjesë e traditave dhe kulturës shqiptare. Myftiu ka thënë se muslimanët në Shkodër dhe Shqipëri nuk janë pakica, si muslimanët në Evropë, por origjinë dhe pjesë e shëndetshme e rrënjëve të këtij vendi. Pavarësisht kësaj, Myftiu ka theksuar se të drejtat dhe pronat e muslimanëve shqiptar, vazhdojnë të mbeten peng edhe në këto ditë, megjithëse kanë kaluar 22 vite nga rënia e sistemit ateist, i cili prishi, shkatërroi dhe sekuestroi të gjitha pasuritë dhe pronat e bashkësisë së muslimanëve shqiptarë.
           
Nga ana e tij Drejtori i “Islamic Relief” Hollandë, z. Mostapha Bouchallikh, ka shprehur kënaqësinë e tij për këtë vizitë dhe ka theksuar se rizgjimi i ymetit islam, sidomos në botën arabe, do të thotë forcim i pozitave të muslimanëve kudo në botë. Ai ka theksuar se feja islame ka ardhur për të mbjellur paqe dhe harmoni kudo në botë dhe se detyra e protagonistëve të kësaj thirrje të bekuar islame është të bashkëpunojnë për të mirën e mbarë njerëzimit.
           
Gjatë fjalës së tij, Myftiu i Shkodrës, ka shprehur mirënjohjen e tij edhe për kontributin e madh që ka dhënë “Islamic Relief” në Shkodër, sidomos në mbështetjen dhe financimin e Medresesë “Haxhi Sheh Shamia”, dega djem, në vitet më të vështira të saj. Ai ka theksuar, se Myftinia Shkodër e ka për nder të ketë bashkëpunëtor dhe partner të saj “Islamic Relief”, i dëshmuar edhe për realizimin e shumë projekteve sociale dhe kulturore në zonën e Veriut të Shqipërisë. Myftiu ka falënderuar kontributin e madh që ka dhënë Drejtori i këtij Fondacioni Bamirës në Shqipëri, z. Muhammed El-Waei për mbarëvajtjen e projekteve dhe tërheqjen e fondeve bamirëse për realizimin e projekteve të ndryshme bamirëse në Shkodër.           

Në fund, bashkëbiseduesit ka qenë të mendimit se duhen shtuar mënyrat e komunikimit të ndërsjellët në shërbim të interesave të Thirrjes Islame, në Shkodër dhe përtej saj.