Paraditën e së martës, më 22 maj 2012, Myftiu Imam Muhamed Sytari ka inspektuar fillimin e  punimeve që po bëhen për ndërtimin e xhamisë së re në fshatin Kuç, Komuna Guri i Zi.
           
Gjatë këtij inspektimi, Myftiu shoqërohej edhe nga menaxheri i pronave të Myftinisë Shkodër, z. Blendi Alushi, administratori z. Kleves Kraja, si dhe përfaqësuesit e ndërtuesit.
           
Fillimisht është bërë saktësimi i drejtimit të kibles dhe matjet e para të territorit, ku do të ndërtohet xhamia e re e këtij fshati. Xhamia e re do të ngrihet mbi xhaminë aktuale, e cila rrezikonte të shembej nga dy përmbytjet e fundit.
           
Ndërtimi i xhamisë së re në fshatin Kuç ka qenë një domosdoshmëri, duke marrë parasysh amortizimin e madh të xhamisë aktuale. Lajmi i ndërtimit të xhamisë së re ka qenë një sihariq i madh për besimtarët muslimanë të kësaj zone, sidomos për më të moshuarit që janë lutur vazhdimisht që të kenë një xhami të re në fshatin e tyre.
           
Janë dhënë disa orientime në terren në lidhje me ndërtimin e një pjese mbrojtëse për xhaminë e re nga përmbytjet e mundshme, aq më shumë që akoma nuk është ndërtuar asnjë argjinaturë mbrojtëse për këtë fshat që rrezikohet shumë nga fryrjet e lumenjve dhe shirat e rrëmbyeshëm.           

Vlen të përmendet se me gjithë dëmet e mëdha të përmbytjeve, që shkaktuan rrezikun e shembjes së kësaj xhamie, Myftinia Shkodër nuk është dëmshpërblyer akoma. Rreziku i përmbytjes së këtij fshati dhe i fshatit Vukatanë është akoma i pranishëm me devijimet e lumenjve Kir dhe Drin, si dhe me mos ndërtimin e argjinaturave mbrojtëse për këtë zonë.