Gjatë ceremonisë së zhvilluar nga Myftinia Shkodër në përkujtim të jetës dhe veprës së Myftiut H. Faik Hoxha, më 12 maj 2012, me shumë emocion është ndjekur fjala e Famullitarit të Kishës Ortodokse të Shkodrës, At Aleksandër Petani.
           
Gjatë fjalës së tij, Famullitari i Kishës Ortodokse në Shkodër, ka kujtuar momente të shumta nga bashkëpunimi me Myftiun e Shkodrës H. Faik Hoxha. Ka sjellur në vëmendje të pranishëmve edhe vitin e zymtë 1997, ku ka kujtuar se sëbashku me Myftiun dhe përfaqësuesit e ndryshëm fetarë kanë bërë një punë shumë të vështirë “në mes të plumbave”, si e si për të ruajtur harmoninë, paqen dhe qetësinë në Shkodër.
           
Me shumë emocion, At Aleksandër Petani i është drejtuar drejtuesve lokalë: “Dua t’ju bëj një kërkesë, që dua të ma realizoni, ju z. Kyetar i Bashkisë dhe ju të nderuar anëtar të Këshillit Bashkiak të Shkodrës. Dua t’ju kërkoj në emrin tim dhe të komunitetit ortodoks të Shkodrës, që një rruge kryesore, një sheshi a një shkolle në Shkodër t’i vendoset emri “Faik Hoxha”. Ju lutem ma plotësoni këtë kërkesë!”
           
Këto fjalë, jo vetëm që kanë mbushur sallën me emocione dhe duartrokitje, por kanë vërtetuar edhe një herë madhështinë e frymës së harmonisë ndërfetare që ekziston në Shkodër dhe përtej saj në mbarë Shqipërinë. Nëse duhet të mburremi me ndonjë visar të shtrenjtë, ne shqiptarët duhet t’i tregojmë botës harmoninë dhe virtytin e bashkëjetesës ndërfetare. Tashmë, në përvjetorin e 100- të të shtetit shqiptar, kjo vlerë vjen edhe si një garanci për mbarësinë dhe qëndrimin solid të Shqipërisë sonë të dashur, para kombeve dhe popujve të tjerë.
           
All-llahu i begatoftë të gjithë ata prijës fetarë që punojnë dhe angazhohen për të mbjellur paqen, harmoninë dhe bashkëjetesën paqësore në mes të bijve të feve të ndryshme në botë!

Myftinia Shkodër