Paraditën e së shtunës, më 12 maj 2012, në ambientet e kinema “Millennium”, Myftinia Shkodër ka organizuar një ceremoni përkujtimore në nder të jetës dhe veprës së Myftiut H. Faik Hoxha (1930-2011).
           
Ceremonia përkujtimore ka nisur me këndimin e një pjese kur’anore dhe është pasuar me përshëndetjen e nën/kryetarit të Komunitetit Mysliman të Shqipërisë, z. Bujar Spahiu. Në fjalën e tij, z. Spahiu ka përcjellur përshëndetjet e Kryetarit të Komunitetit Mysliman të Shqipërisë, H. Selim Muça, ku është vlerësuar angazhimi i H. Faik Hoxhës si Myfti i Shkodrës në vitet 1991-2003. Është vlerësuar roli i tij në ruajtjen e traditave islame në Shkodër e Shqipëri, ndikimi në forcimin e frymës së harmonisë ndërfetare etj.
           
Më pas, kanë përshëndetur përfaqësuesit e komuniteteve fetare, ai i Arqipeshkvisë Shkodër, Famullitari i Kishës Ortodokse, At Aleksandër Petani dhe Myftiu i Shkodrës Imam Muhamed Sytari. Në fjalën e tyre është vlerësuar personaliteti i Myftiut H. Faik Hoxha, sidomos në vitet 1997-1998, ku vendi ynë ishte në buzë të një gremine shkatërrimtare për popullin shqiptar, harmoninë dhe të ardhmen e tij dhe roli i drejtuesve të komuniteteve fetare ishte vendimtar në ruajtjen e paqes dhe mbjelljen e harmonisë.
           
Me shumë emocion është ndjekur filmi: “Në kujtim të Myftiut Haxhi Faik Hoxha”, i realizuar nga Myftinia Shkodër. Nëpërmjet tij, të pranishmit kanë mundur të dëgjojnë në vetën e parë, dhe të shohin momentet më të spikatura të jetës dhe sakrificës së H. Faik Hoxhës, vitet e burgut, ato të myftinisë etj.
           
Kanë referuar edhe bashkëkohësit dhe bashkëpunëtorët e tij të afërt, z. Ismail Muçej dhe H. Fejzi Zaganjori, që kanë sjellur kujtime dhe vlerësime të shumta rreth jetës dhe veprimtarisë së Myftiut H. Faik Hoxha.
           
Në fund, ceremonia është përshëndetur edhe nga familja Hoxha, që ka shprehur falënderimet për këtë organizim dhe vlerësimet më të mira për frymën e harmonisë dhe besimit që ka sot Shkodra dhe Shqipëria, falë edhe punës dhe angazhimit të Myftiut Faik Hoxha dhe atyre që e pasuan punën dhe veprën e  tij deri më sot.

Në këtë ceremoni merrnin pjesë drejtuesit më të lartë lokalë dhe vendorë të Shkodrës, deputetë, myftilerë të qyteteve të ndryshme, drejtues të shoqatave islame, intelektualë dhe besimtarë të shumtë.

Ceremonia është përcjellur edhe nga mediat lokale të Shkodrës, Lezhës dhe Malësisë së Madhe.