Ditën e xhuma, më 11 maj 2012, në xhaminë e Rusit është organizuar një ceremoni përkujtimore kushtuar Myftiut të Shkodrës (1991 - 2003), Haxhi Faik Hoxha, i cili u nda nga jeta një vit më parë, më 12 maj 2011.
           
Në këtë ceremoni ka prezantuar edhe Myftiu aktual i Shkodrës, Imam Muhamed Sytari, që ka mbajtur edhe hytben e xhumasë.
           
Fillimisht, ceremonia është hapur me fjalën e imamit të xhamisë së Rusit, H. Fejzi Zaganjori, i cili ka vlerësuar kujtimin e mirë të Myftiut H. Faik Hoxha. Ai ka thënë se në nderim të kujtimit të mirë të Myftiut rahmetli, besimtarët e xhamisë së Rusit kanë kënduar një hatme të plotë të Kur’anit, që po mbyllet sot, në këtë ditë të begatë.
           
Edhe Myftiu i Shkodrës, ka vlerësuar këto tubime, që reflektojnë respektin dhe nderimin ndaj prijësve të shkuar islamë të Shkodrës, si dhe na afrojnë më shumë me adhurimin dhe përuljen ndaj Zotit të botrave.
           
Më pas, në hytben e xhumasë, Imam Muhamed Sytari ka folur mbi vlerën e dijes, dijetarëve dhe prijësve islamë në shoqëri. Ndër të tjera, Myftiu ka thënë se: “Hytbeja e sotme na lidh me kujtimin e Myftiut të Shkodrës Haxhi Faik Hoxha, i cili për 12 vite, më të vështirat vite të rimëkëmbjes së Thirrjes Islame në Shkodër, bëri shumë për këtë fe dhe mesazhet e saj të larta. Teksa sot e kujtojmë shërbimin dhe angazhimin e tij në shërbim të fesë islame, nuk ka sesi të mos na vijnë ndër mend ajetet dhe hadithet e shumta që nxisin respekt ndaj dijes dhe dijetarëve, prijësve fetarë dhe sakrifikuesve në rrugën e gjallërimit të Thirrjes Islame, kudo qofshin.”           

Myftiu ka sjellë shembuj të ndryshëm nga Kur’ani dhe Hadithi, nëpërmjet të cilëve ka bërë thirrje që të kthehemi sa më shumë nga dija sepse, sikurse ka theksuar: “Rrugët e dijes i hapin sytë shoqërive për të parë se ku dhe si jetojnë. Dija na bën të lartësohemi nga niveli i masës së nënshtruar drejt nivelit të njerëzve që janë të aftë të kuptojnë realitet dhe të veprojnë me urtësi në raport me përzgjedhjet që lidhen me të ardhmen e tyre. Më lejoni në këtë kontekst të përmend një bashkëbisedim të Hasan Basriut me një person që mallokonte Haxhaxhin. Basriu, pasi e dëgjoi i tha: “O vëlla, mos e mallko Haxhaxhin, se mund të ndodhë që pas tij t’ju drejtojnë majmunë dhe derra!” Prandaj, mos t’ia kthejmë shpinën thellimit në dije!”.