Pasditën e së shtunës, më 28 prill 2012, Myftinia Shkodër ka organizuar një aktivitet shkencor të titulluar: “Në gjurmët e qitabeve të imamit H. Ali Shoshi”. Qëllimi i tij ka qenë të sjellë në vëmendje të opinionit qytetar të Shkodrës dhe përtej tij, vlerën dhe përkushtimin e hoxhallarëve shkodranë në ndërtim të një sistemi vlerash islame, bazuar në dije, përkushtim dhe sinqeritet.
           
Në qendër të vëmendjes, kanë qenë 30 libra të vjetër, pjesë e bibliotekës së imamit Ali Shoshi, të shpëtuar nga familjarët e tij, ditën kur biblioteka u bastis dhe u sekuestrua në vitin 1967.
           
Aktiviteti ka nisur me referatin e Myftiut Imam Muhamed Sytari, me temë: “30 qitabe që zgjojnë kujtimin e nderuar të imamit H. Ali Shoshi”. Gjatë tij, Myftiu ka nxjerrë në pah përbërjen e këtyre librave dhe rëndësinë që ka kjo trashëgimi e shtrenjtë për brezat e rinj të muslimanëve në Shkodër dhe përtej saj. Myftiu ka theksuar se ky aktivitet është edhe një arsye më shumë për të respektuar hoxhallarët dhe imamët e nderuar të Shkodrës, që ishin njerëz të ditur, njohës të gjuhëve të huaja të kohës dhe të thelluar në shkencat e fesë. Për këtë, ai ka sjellë shembuj të ndryshëm nga përbërja e librave të mbetur nga biblioteka e imamit Ali Shoshi, që e ka konsideruar si një trashëgimi të shtrenjtë të kulturës islame dhe asaj kombëtare.
           
Më pas ka referuar teologu Gilman Kazazi, imam i xhamisë “Ebu Bekër”. Në fjalën e tij me temë: “Respekti i dijes dhe i dijetarëve në shënimet e H. Ali Shoshit”, ka spikatur disa vargje të gjetura me shkrimin e imamit Ali Shoshi, nëpërmjet të cilave nxitet respekti dhe nderimi i dijetarëve dhe mësuesve të fesë. Nëpërmjet shembujve të ndryshëm, referuesi ka tërhequr vëmendjen e të pranishmëve drejt vlerave të dijes dhe respektimit të dijetarëve në fenë islame.
           
Aktivitetin e ka përshëndetur edhe imami i xhamisë së Rusit, H. Fejzi Zaganjori, ku ka shprehur falënderimet e tij për organizimin e këtij aktiviteti që nxjerr në pah vlera dhe kujtime të mira edhe për një figurë tjetër të komunitetit musliman të Shkodrës, “të mbetur në heshtje për shumë dekada”.
           
Me shumë emocion, të pranishmit kanë ndjekur rrëfimin e nipit të H. Ali Shoshit, historianit Muhamet Shala, i cili ka rrëfyer sesi i ka shpëtuar këto libra nga djegia dhe sekuestrimi në një kohë të vështirë, plot intriga dhe armiqësi ndaj fesë islame dhe njerëzve të saj besnikë. Ai ka treguar se ditën kur është sekuestruar biblioteka e H. Ali Shoshit, janë mbushur tre karroca të mëdha me libra pafund nga kjo bibliotekë. Ai ka kujtuar se ky aktivitet është një nderim për dajën e tij, imamin Ali Shoshi, por edhe një respekt për qytetin që nxori një numër të madh hoxhallarësh të ditur e të thelluar në shkencat e ndryshme të fesë islame.           

Në fund të aktivitetit, të pranishmit kanë vizituar me shumë kureshtje 30 librat e ekspozuar, si dhe kanë ndarë mbresat dhe emocionet e këtij aktiviteti në një ftesë për çaj.