Myftinia Shkodër ka organizuar ditën e shtunë, më 21 prill 2012, pas namazit të akshamit një tribunë fetare me temë: “Shpresa në mëshirën e All-llahut”, në xhaminë e Kirasit. I ftuar në këtë tribunë ka qenë teologu Ahmed Kalaja, imam i xhamisë “Dine Hoxha” në Tiranë.
           
Aktiviteti është hapur nga imami i xhamisë, teologu Ylli Buraniqi, i cili ka falënderuar Myftininë Shkodër për përzgjedhjen e xhamisë Kiras për këtë aktivitet me vlera për besimtarët. Ai ka shprehur mirënjohjen e tij edhe për të ftuarin e kësaj mbrëmje dhe është lutur për të mirën e besimtarëve.
           
Ndërkohë, Myftiu i Shkodrës Imam Muhamed Sytari ka theksuar se këto tribuna fetare do të organizohen në të gjitha xhamitë e Shkodrës, si një përpjekje për t’i afruar edhe më shumë besimtarët me njëri-tjetrin dhe me shpirtin e dijes dhe të besimit.

Ai ka theksuar se dekadat, në të cilat shqiptarët jetuan larg fesë dhe mësimeve të besimit, ishin vitet më të errëta të historisë tonë kombëtare. Myftiu ka falënderuar teologun Ahmed Kalaja për prezencën e tij dhe ka uruar suksese dhe mbarësi për aktivitetin në fjalë.

Në vasin e tij para të pranishëmve, teologu Ahmed Kalaja ka folur për rëndësinë që ka për jetën e besimtarit shpresa në mëshirën dhe faljen e All-llahut. Nëpërmjet argumenteve të shumta, ai ka shpjeguar sesi All-llahu i Mdhëruar ia ka lënë të hapur derën e pendimit robëve të Tij. Më pas, ka sjellur shembuj të ndryshëm nga jeta e dijetarëve të shquar të fesë islame dhe marrëdhënia e tyre me Zotin e gjithësisë.           

Aktiviteti është përshëndetur edhe nga Myftiu i Malësisë së Madhe, H. Edmir Smajlaj, që ka vlerësuar tubimet, në të cilat bashkohen zemrat dhe zbret mëshira hyjnore.