Paraditën e së xhumasë, më 20 prill 2012, ka mbërritur në Shkodër biznesmeni i mirënjohur nga Arabia Saudite, z. Zamil Ez-Zamil, i shoqëruar nga dr. Abdurr-rrahman Ez-Zamil, z. Nasir Ez-Zamil dhe ambasadori i Shqipërisë në Arabinë Saudite, z. Admirim Banaj.
           
Fillimisht, përfaqësuesit e familjes Ez-Zamil kanë zhvilluar një vizitë të përzemërt në Myftininë e Shkodrës, ku janë pritur nga Myftiu Imam Muhamed Sytari.

Gjatë këtij takimi, Myftiu ka falënderuar familjen Ez-Zamil për kontributin e madh që ka dhënë në rimëkëmbjen e Thirrjes Islame në Shkodër, me ndërtimin e xhamisë “Ebu Bekër”, 17 vite më parë. Myftiu ka theksuar se kjo është një ditë e shënuar për Myftininë Shkodër, pasi vizita e pjestarëve të familjes Ez-Zamil, na kujton atë dhuratë të paharruar për Shkodrën dhe krejt Komunitetin Mysliman të Shqipërisë, xhaminë e madhe të Shkodrës.
           
Myftiu i ka njohur vizitorët me disa nga projektet e Myftinisë Shkodër dhe ka theksuar se shtimi i ambasadave arabe në Shqipëri është një sihariq i madh dhe një mundësi më shumë për të tërhequr vëmendjen e vëllezërve tanë drejt Shkodrës dhe zhvillimi të mëtejshëm të projekteve për ndërtimin e saj.
           
Në shenjë mirënjohje, Myftiu i ka dhuruar vëllezërve Ez-Zamil një panoramë të Shkodrës, në qendër të së cilës ndodhen dy xhamitë kryesore, si një dëshmi e besimit dhe harmonisë së tij.
           
Më pas, miqtë e shtrenjtë nga Arabia Saudite kanë falur namazin e xhumasë në xhaminë “Ebu Bekër”, ku kanë dëgjuar edhe hytben e Myftiut. Gjatë saj, ai ka theksuar se të gjithë muslimanët e Shkodrës duhet t’i jenë mirënjohës familjes Ez-Zamil, që të udhëzuar nga Zoti i gjithësisë vendosën ta zbukuronin Shkodrën me nusen e xhamive të saj, duke mundësuar këtë realitet që e dëshmojmë të gjithë.
           
Pas namazit të xhumasë, vëllezërit Ez-Zamil, të shoqëruar edhe nga Myftiu, kanë bërë një vizitë në zyrën e Kryetarit të Bashkisë Shkodër, z. Lorenc Luka, me të cilin kanë zhvilluar një bashkëbisedim të ngrohtë dhe kanë këmbyer dhuratat e rastit.
           
Për nder të miqve, Myftiu ka shtruar një drekë vëllazërore.            Vizita e vëllezërve Ez-Zamil, ka përfunduar te Xhamia e Plumbit, ku kanë parë nga afër situatën e saj dhe gjurmët e xhamisë së Qafës.