“Ajo që kam parë sot është një pasuri e madhe për Shqipërinë, e cila duhet ruajtur dhe duhet rehabilituar sa më parë”- kanë qenë disa nga vlerësimet e ambasadorit të Kuvajtit Najjeb A. Al-Bader, të bëra sot, më 19 prill 2012, gjatë vizitës në Xhaminë e Plumbit.

I shoqëruar edhe nga Myftiu Imam Muhamed Sytari, ambasadori Al-Bader ka vizituar nga afër ambientet e xhamisë së Plumbit, sikurse ka vëzhguar një pjesë të punimeve për zbardhjen e plotë të themeleve dhe gjurmëve të xhamisë së Qafës.

Myftiu i ka bërë një rezume të historikut të kësaj zone historike, të mbushur me gjurmë të shumta të trashëgimisë islame. Ambasadori ka kërkuar nga Myftinia që të angazhohet maksimalisht që kjo zonë të klasifikohet si zonë e mbrojtur nga UNESCO, pasi, siç ka theksuar, ajo përbën një pasuri të madhe dhe një peisazh të mrekullueshëm që të tërheq vëmendjen e çdo vizitori.

Ambasadori Al-Bader, ka hyrë edhe në brendësi të objektit të Xhamisë së Plumbit, ku ka shprehur befasinë e tij sesi një objekt kaq i rëndësishëm i trashëgimisë kulturore dhe fetare të një vendi, të lihet pas dore në këtë mënyrë.

Z. Al-Bader ka shprehur se ai do të jetë i gatshëm për të ndjekur maksimalisht çdo përpjekje pozitive për rehabilitimin e plotë të kësaj xhamie dhe zonës përreth.