Pasditën e xhumasë, më 23 mars 2012, Myftinia Shkodër ka organizuar një tryezë përkujtimore me rastin e 5 vjetorit të inaugurimit të xhamisë së re të Parrucës, e financuar nga bamirësi shkodran, z. Sait Fishta.
           
Aktiviteti ka nisur me transmetimin e një filmi 20 minutësh, nëpërmjet të cilit të pranishmit kanë pasur mundësi të ndjekin momentet më të spikatura të ceremonisë së inaugurimit të kësaj xhamie të re, në mes të Shkodrës, 5 vite më parë.
           
Më pas, imami i xhamisë së Parrucës, teologu Naim Drijaj, ka folur rreth përgjegjësisë së të qenurit imam në xhaminë e Parrucës. Ai ka shprehur emocionet dhe kujtimet e tij më të mira gjatë këtyre viteve, në të cilat shërben si imam në xhaminë e Parrucës.
           
Me shumë nderim është pasuar fjala e sponsorizuesit të kësaj xhamie, z. Sait Fishta, i cili ka falënderuar All-llahun e Madhëruar, i Cili ia mundësoi këtë mirësi të madhe për ndërtimin e një xhamie me histori të madhe, si ajo e Parrucës.
           
Aktiviteti është përshëndetur edhe nga Myftiu i Shkodrës Imam Muhamed Sytari, që ka theksuar se ndërtimi i xhamisë me duar të pastra shqiptare, është një sinjal i mirë dhe nxitës për bamirësi të tjera nga biznesmenët muslimanë shqiptarë.

Myftiu ka falënderuar bamirësin Sait Fishta, duke theksuar se me këtë vepër, ai ka merituar të jetë qytetar nderi, besimtar nderi, vëlla nderi dhe mik nderi i Shkodrës. Më pas, i ka dhuruar atij një kujtim nga momentet e ceremonisë së inaugurimit të xhamisë së re të Parrucës, më 23 mars 2007.
           
Kanë përshendetur edhe H. Fejzi Zaganjori dhe z. Astrit Dervishi, të cilët nuk i kanë kursyer falënderimet dhe mirënjohjen e tyre për personin që kontribuoi materialisht për të pasur sot një xhami model në mes të Shkodrës.
           
Për të ftuarit, u shtrua edhe një koktejl, ku bashkëbisedimet dhe këmbimet e urimeve vazhduan në një frymë vëllazërore islame.           

Në këtë tryezë përkujtimore merrnin pjesë imamët e xhamive kryesore të Shkodrës, intelektualë, studiues të ndryshëm, besimtarë.