Paraditën e së martës, më 13 mars 2012, në mbledhjen e tyre të jashtëzakonshme, imamët e Shkodrës kanë dënuar provokimet fetare që po ndodhin kundër vëllezërve muslimanë shqiptarë në trojet tona në Maqedoni. Ata kanë dënuar edhe djegien e flamurit kombëtar, duke theksuar se këto janë akte terroriste që nxisin urrejtje fetare dhe destabilizojnë përpjekjet e sinqerta të imamëve dhe prijësve fetarë islamë në krejt trojet shqiptare për harmoni e tolerancë ndërfetare. Më herët, në karnevalet e Maqedonisë, është abuzuar me Kur’anin, librin e shenjtë të muslimanëve, akt i cili është konsideruar si “mesjetar e barbar” nga imamët e nderuar.
           
Në këtë tubim të imamëve është përmendur edhe rasti i Prishtinës, ku muslimanët provokohen me moslejimin e ndërtimit të një xhamie të madhe atje, pa marrë parasysh faktin se krejt Kosova është muslimane, ndërkohë që tendencat antiislame kanë ngulur rrënjë thellë në atë tokë të dashur.
           
Imamët janë udhëzuar që gjatë hytbeve të xhumave në vijim, të japin mesazhe të urta për harmoninë fetare dhe atë kombëtare, si dhe të nxisin frymën e vëllazërisë në mes të muslimanëve.
           
Në këtë takim, imamëve u është komunikuar edhe zhvillimi i një tribune fetare, me datën 20 mars 2012, në orën 17.00 te salla e konferencave pranë Medresesë së djemve, ku H. Bashkim Bajraktari do të flasë mbi rolin e imamëve në ripërtëritjen e Thirrjes Islame.