Pasditën e së enjtes, më 8 mars 2012, Myftiu i Shkodrës Imam Muhamed Sytari ka pritur në një vizitë vëllazërore një grup studiuesish nga Universiteti i Bosforit në Stamboll të Turqisë.
           
Gjatë vizitës, studiuesit nga Stambolli janë interesuar të dijnë për historinë e Islamit në Shkodër dhe zhvillimet e Thirrjes Islame në këtë qytet tërheqës për çdo vizitor.
           
Myftiu ka shpjeguar se Islami i ka gjurmët e thella dhe shumëshekullore në Shkodër e Shqipëri. Ai ka theksuar se historia ka vërtetuar se feja islame është zhvilluar edhe më shumë në trojet shqiptare pasi ato u bënë pjesë e kalifatit osman.
           
Myftiu ka falënderuar kontributin e universiteteve, shoqatave bamirëse dhe fondacioneve të ndryshme kulturore turke pas vitit 1990 në Shqipëri dhe ka theksuar se traditat islame janë një emërues i përbashkët i shqiptarëve me popullin vëlla turk.           

Gjatë këtij takimi Myftiu i ka njohur vizitorët edhe me faktin se Shkodra është një qytet me dominancë islame, ku jetojnë edhe dy komunitete të tjera fetare, ai katolik dhe ai ortodoks. Sikurse ka theksuar se harmonia dhe bashkëjetesa ndërfetare gjatë historisë së këtij qyteti ka dëshmuar një normalitet, që buron nga mësimet e shenjta dhe tradita profetike e dëshmuar historikisht.