Paraditën e së hënës, më 5 mars 2012, imamët e qytetit të Shkodrës kanë diskutuar mënyrat e rritjes së angazhimit në fushën e botimeve dhe zhvillimit të aktiviteteve të ndryshme në funksion të përmirësimit cilësor së prezencës së frymës islame në qytet dhe përtej tij.
           
Imamët kanë rënë dakort se duhet rritur cilësia e materialeve që botohen dhe u serviren besimtarëve nëpërmjet organeve të shtypit islam në Shkodër, Shqipëri dhe në trevat shqiptare, si dhe duhet shtuar kontributi i tyre për gazetën e Myftinisë Shkodër “Udha Islame” dhe përtej saj. Është bërë një krahasim me të shkuarën, ku janë përmendur botimet e hoxhallarëve të Shkodrës dhe nevoja e ruatjes së traditave të vyera në këtë drejtim.
           
Është diskutuar për projektin e një botimi të ri të përvitshëm të Myftinisë Shkodër, në të cilin do të mblidhet kontributi i teologëve të Shkodrës, në fusha të ndryshme të shkencave islame. Ky botim, do të jetë një risi e re në shërbim të rritjes së botimeve islame në qytetin e Shkodrës.
           
Gjithashtu është diskutuar edhe për aktivitetet e Myftinisë Shkodër, ku është kërkuar që në çdo xhami të rritet cilësia e vaseve, hytbeve dhe aktiviteteve të tjera në shërbim të komunitetit.           

Është lajmëruar se ditën e shtunë, më 10 mars 2012, Myftinia Shkodër në bashkëpunim me Shtëpinë botuese “Logos-A”, nga Shkupi, do të organizojë promovimin e veprës: “Muhammedi (a.s) – jeta dhe vepra” e dijetarit të shquar H. Vehbi S. Gavoçi.