Ditën e hënë, më 27 shkurt 2012, në xhaminë e Medresesë, pas faljes së namazit të drekës, u zhvillua një aktivitet fetar në kuadër të përkujtimit të Mevludit Sherifë, ditëlindjes së Profetit të Islamit a.s. Krahas shumë besimtarëve dhe nxënësve të medresesë së djemve merrnin pjesë përfaqësues të Myftinisë, teologë, imamë, drejtues dhe mësues të shkollës “Haxhi Sheh Shamia”.

Aktiviteti u hap me leximin e disa ajeteve kur’anore dhe me fjalën e teologut Resmi Lika. Nga Myftinia Shkodër përshëndeti përfaqësuesi i saj, teologu Arben Halluni, i cili ndër të tjera theksoi se: “Përjetimi i kënaqësisë së përkujtimit të Mevludit Sherifë nuk është vetëm data 12 Rebiul-Evvel, por në çdo datë dhe në çdo moment mund të përjetohet natyrshëm kënaqësia e përkujtimit të këtij njeriu të madh dhe të  përkryer për mbarë njerëzimin…”.

Ndërsa teologu Adil Cukali mbajti ligjëratën rreth jetës dhe veprës shembullore të Pejgamberit Muhamed a.s. Gjatë referimit, ligjëruesi solli plot shembuj të besimit, adhurimit dhe moralit që ka shfaqur i Dërguari i Allahut në kohën e tij, por që vlejnë edhe për kohën e sotme dhe të ardhmes.

Në fund të aktivitetit, një grup nxënësish të medresesë prezantoi një program të shkurtër artistik me salavate, ilahi dhe këndim të disa pjesëve të Mevludit Sherif.