Pasditën e së hënës, më 27 shkurt 2012, Myftiu i Shkodrës Imam Muhamed Sytari ka zhvilluar një bisedë telefonike me dijetarin e shquar islam me prejardhje nga Shkodra, H. Vehbi Sulejman Gavoçi, i cili jeton dhe punon në Damask të Sirisë.
           
Myftiu është interesuar për shëndetin e Hoxhës së moshuar, për aktivitetin e tij dhe është lutur që All-llahu t’i japë shëndet të plotë, forcë dhe mbarësi për të qëndruar si një pishtar udhëzimi për të rinjtë muslimanë dhe ymetin islam.

Ndërkohë, Hoxha i moshuar, është lutur për mbarësinë e Thirrjes Islame, për rininë, burrat dhe gratë besimtare në Shkodër dhe në mbarë Shqipërinë. Hoxha i nderuar ka këshilluar që të mos lihet pas dore feja dhe që shqiptarët të kujtojnë rrënjët e tyre islame dhe të frikësohen para duarve të All-llahut.

H. Vehbi S. Gavoçi ka lindur në qershor të vitit 1923 në Shkodër. Në qershor të vitit 1937, i ati, H. Sulejman Gavoçi, me familje dhe disa të afërm emigroi drejt Sirisë, ku u vendos në Damask, ku edhe ndërroi jetë.

Në periudhën 1937-1947, Hoxha i nderuar kreu studimet teologjike në Universitetin “El-Ez’her” në Kajro të Egjiptit dhe nga ajo kohë e deri në ditët e sotme ka punuar me shpirt dhe përkushtim për Thirrjen Islame dhe dituritë e shkencave islame, fikhut hanefi, akides, moralit islam, historisë islame etj, duke u afirmuar si një ndër dijetarët më elitarë të botës islame me veprat e tij, këshillën e ëmbël dhe mësimet e tij.

Ka dhënë mësime në shkollat më të mira të teologjisë islame në Medine të Arabisë Saudite, në Amman të Jordanisë, në Damask e Haleb të Sirisë, në Dubaj të Emirateve të Bashkuara Arabe etj. Është autor i mbi 30 veprave islame në gjuhën shqipe, i mbi 25 veprave origjinale në gjuhën arabe, si dhe bashkëautor e redaktor i mbi 10 veprave në gjuhën arabe.

Në vitin 2005, Imam Muhamed Sytari ka botuar në Prishtinë, monografinë: "Vehbi Sulejman Gavoçi- Dijetar nga dijetarët e ymmetit"- (Botim i Bashkësisë Islame të Kosovës).