Pasditën e së xhumasë, më 24 shkurt 2012, Këshilli i Myftinisë Shkodër ka zhvilluar mbledhjen e tij të radhës, duke diskutuar mbi disa çështje që lidhen me ecurinë e aktivitetit të Myftinisë si dhe për disa projekte të reja për të ardhmen e Thirrjes Islame në Shkodër.
           
Në fjalën e tij, Myftiu Imam Muhamed Sytari ka prezantuar para antarëve të Këshillit të Myftinisë disa nga çështjet e pazgjidhura nga viti i kaluar, ku ka përmendur një shkresë të tetorit 2010 dërguar Këshillit të Bashkisë Shkodër në lidhje me emërtimin e disa rrugëve dhe sheshit bri xhamisë “Ebu Bekër”, për të cilin ka theksuar se Myftinia do ta përsërisë kërkesën e saj të neglizhuar nga Këshilli i Bashkisë.
           
Në këtë mbledhje është diskutuar edhe për zhvillimin e aktiviteteve me rastin e 100 vjetorit të Shqipërisë, ku Myftiu ka kërkuar që nëpërmjet këtyre aktiviteteve të dalë në pah kontributi i madh që hoxhallarët dhe prijësit islam kanë dhënë për këtë vend. Ai ka theksuar se ky kontribut, ka kohë që ka ngelur në hije, si pasojë e politikave denigruese ndaj vlerave islame në Shqipëri dhe veçanërisht në Shkodër.
           
Është diskutuar edhe zhvillimi i disa aktiviteteve shkencore dhe fetare në muajin mars, në bashkëpunim me partnerë në trojet shqiptare.           

Këshilli i Myftinisë Shkodër ka diskutuar edhe për shumë çështje të tjera që lidhen me rolin që duhet të kenë muslimanët në Shkodër dhe përhapjen e mëtejshme të mesazheve të harmonisë islame në mesin e muslimanëve dhe xhemateve të ndryshme që ka Shkodra.