Paraditën e së dielës, më 19 shkurt 2012, Myftinia Shkodër ka vijuar me ndihmën e familjeve të izoluara nga dëbora e ditëve të fundit në zonën e Shkodrës.  

Një kamion me pako ushqimore për 100 familje janë dërguar drejt Pukës, ku nëpërmjet Myftinisë së këtij qyteti do të bëhet shpërndarja e ndihmave për familjet e izoluara në këtë zonë.
           
Në një intervistë para mediave të pranishme, anëtari i Kryesisë së Komunitetit Mysliman të Shqipërisë, z. Genti Kruja ka deklaruar se që nga ditët e para të kësaj situate, Komuniteti Mysliman i Shqipërisë është sensibilizuar me njerëzit në nevojë dhe ka bërë thirrje që të mblidhen ndihma të ndryshme për të izoluarit nga dëbora. Në këtë kontekst, ai ka falënderuar edhe angazhimin e Myftinisë Shkodër dhe dërgesën e kësaj dite drejt Pukës, ku do të ndihmohen 100 familje në nevojë dhe të izoluara nga dëbora.
           
Ndërkohë, Myftiu i Shkodrës Imam Muhamed Sytari ka theksuar se këto ndihma janë një kontribut human në një situatë, ku të gjithë duhet të bashkëpunojnë për tejkalimin e kësaj situate.

Ai ka përmendur se ditëve të fundit, një deputet i parlamentit shqiptar i ka bërë thirrje drejtuesve fetarë të kthejnë paratë e caktuara për këto komunitete nga qeveria, për të ndihmuar të izoluarit.

Myftiu ka thënë, se komunitetet fetare kanë qenë të parat që janë sensibilizuar me sinqeritet për të ndihmuar njerëzit në nevojë, jo me preferenca raciste, por për “riza të Zotit” dhe pa dallime përçarëse.

“Ai që përpiqet të përfitojë nga situatat kritike që kalon vendi për qëllime meskine, është meskin. Deputeti në fjalë, t’i ftojë kolegët e tij dhe të kontribuojnë me rrogën mujore për njerëzit e izoluar, jo të përpiqet të lartësohet me përmendjen e drejtuesve fetarë të vendit. Deputeti dhe kolegët e tij të mësojnë nga drejtuesit fetarë shqiptarë, frymën e harmonisë, dialogut, bashkëjetesës dhe komunikimit paqësor, jo të përfitojë nga kjo situatë e vështirë për të nxitur përçarje meskine për interesa të ulëta!”- ka thënë Myftiu.