Të xhumanë, më 17 shkurt 2012, Myftiu i Shkodrës Imam Muhamed Sytari ka mbajtur hytben e xhumasë në xhaminë e Bahçallekut, ku ka folur për rëndësinë që ka xhamia në edukimin e njerëzve me besimin në Një Zot, frymëzimin me shpirtin e harmionisë dhe dashurisë për njëri-tjetrin, si dhe plotësimin me moralet e bukura të fesë islame.
           
Në fjalën e tij, Myftiu ka bërë një krahasim të kohës kur shqiptarët prishnin dhe shkatërronin xhamitë në emër të ateizmit dhe sistemit komunist dhe kohës së pas viteve 90-të, kur fushatat kundër Islamit dhe moralit të tij janë modifikuar në formë, por nuk kanë ndryshuar në cilësinë e tyre.

Ndër të tjera, Myftiu ka thënë: "Shqiptarëve u është prishur gjaku, qëkur i lejuan vetes të prishnin xhamitë e All-llahut dhe të mohonin trashëgiminë e tyre shpirtërore! Shqiptarët, e kanë për detyrë të kërkojnë falje dhe të pendohen para duarve të Atij, që nuk hezituan ta mohonin dekada më parë. Ai gjak duhet pastruar me istigfar, sinqeritet dhe përkushtim për të shpëtuar nga pasojat e ndëshkimit hyjnor! Nga 67-ta e tutje, në Shqipëri u mohua ZOTI. Nga 90-ta e tutje, po punohet për mohimin e trashëgimisë së shpirtit islam dhe zëvendësimin e tij me modelin e hipokrizisë dhe laramanizmit! Zot na fal dhe na udhëzo!
           
Më lejoni të sjell një shembull në përforcim të kësaj që po them. Në vitin 1967, propaganda antiislame kishte mbërritur deri aty, sa në gazetën famëkeqe “Zëri i Popullit” shkruheshin edhe çmenduri të tilla si: “...Pak ditë ma parë ne vendosëm njëzani t’i kthejmë dy xhamijat e lagjes nga institucione të errësinës dhe vatra të propagandës së çfrenueme kundër interesave të popullit në qendra për edukimin dhe argëtimin e brezit të ri...” [1] Si kjo dëshmi e zezë, ka plot në këtë gazetë dhe simotrat e saj! Por, pas viteve 90-të, nuk ka pasur ndonjë ndryshim në cilësinë e kësaj propagande, ndonëse ka ndryshuar stili; nuk prishen më xhami, por prishet shpirti i rinisë, që është e barabartë me prishjen e shpirtit të krejt kombit!”
           
Gjatë kësaj hytbeje, Myftiu ka bërë thirrje edhe për të ndihmuar njerëzit në nevojë dhe në veçanti të izoluarit nga dëbora gjatë ditëve të fundit. Ai është lutur për ta dhe për mirëqenien në Shkodër, Shqipëri dhe në mbarë ymetin islam.

Al. Hoxha

[1] Letër e hapur e popullit të bllokut nr. 1-2 të lagjes “Kongresi i Përmetit”, Shkodër, me titull: “Do të heqim të gjitha ceremonitë e festat fetare”, në gazetën  “Zëri i popullit”, v. 26, nr. 73 (5798), e dielë, 26 mars 1967, fq. 3. (Letra mban datën 19 mars 1967).