Paraditën e së mërkures, më 15 shkurt 2012, imamët e Shkodrës kanë shprehur sërish gatishmërinë e tyre për t’u solidarizuar në të gjitha mënyrat me situatën e krijuar nga reshjet e dëborës në vendin tonë, ku janë krijuar zona të izoluara dhe vështirësi komunikimi dhe furnizimi me ushqime dhe ilaçe.
           
Në fjalën e tij para imamëve, Myftiu Imam Muhamed Sytari ka vlerësuar iniciativën e Komunitetit Mysliman të Shqipërisë për të ndihmuar nevojtarët në këtë situatë. Ai ka falënderuar kontributin e deritanishëm të imamëve të Shkodrës dhe ka theksuar se edhe gjatë këtyre ditëve do të vazhdojë mbledhja e ndihmave dhe lutjet për njerëzit që kanë nevojë dhe situatën e krijuar.
           
Myftiu ka theksuar se këtë të xhuma do të bëhet sërish thirrje nëpër xhami për të kërkuar ndihma dhe do të bëhen lutje me xhemat për lehtësimin e kësaj gjendje.
           
Në këtë mbledhje është diskutuar edhe për vlerën e ruajtjes së harmonisë dhe thellimin e bashkëpunimit në mes të besimtarëve, si një vlerë islame dhe një kontribut për harmoninë kombëtare.           

Myftiu ka lajmëruar imamët se paraditën e së shtunës, më 18 shkurt 2012, Komuniteti Mysliman i Shqipërisë do të organizojë në Tiranë një aktivitet shkencor me rastin e 20 vjetorit të daljes në qarkullim të gazetës “Drita Islame”.