Në kuadër të fushatës së solidaritetit me njerëzit e izoluar nga dëbora e ditëve të fundit, që ka ndërmarrë Komuniteti Mysliman i Shqipërisë, ditën e hënë, më 13 shkurt 2012, Myftinia Shkodër ka organizuar shpërndarjen e pakove ushqimore për 80 familje rome të izoluara nga dëbora në hyrje të qytetit të Shkodrës.
           
I pranishëm në shpërndarjen e ndihmave ka qenë edhe Myftiu i Shkodrës Imam Muhamed Sytari, i shoqëruar nga antarë të Këshillit të Myftinisë Shkodër.  

Para mediave të pranishme, Myftiu ka deklaruar se kjo fushatë solidarizimi me njerëzit e izoluar nga dëbora është një nisëm humane dhe bamirëse e Komunitetit Mysliman të Shqipërisë, në ndihmë të vëllezërve dhe motrave që kanë nevojë për ndihmën tonë në këto ditë të vështira. Myftiu ka bërë thirrje që këta njerëz të përkrahen, pasi kushtet e vështira në të cilat jetojnë janë jashtëzakonisht të vështira dhe aspak të përshtatshme për njerëz normal në shekullin 21. Myftiu ka tërhequr vëmendjen e biznesit dhe pushtetit lokal që të interesohet maksimalisht për këtë shtresë të mjerë të shoqërisë sonë, që jeton në kushte krejtësisht të papranueshme për një shoqëri të civilizuar.
           
Në bashkëbisedim me banorët e izoluar të zonës së romëve, Myftiu ka theksuar se Myftinia Shkodër e ka ndërmarrë këtë fushatë humane për t’u ardhur në ndihmë dhe për të sensibilizuar opinionin publik në lidhje me situatën e vështirë në të cilën jeton ky komunitet.
           
Banorët e kësaj zone pothuajse e përmbytur nga uji, bora dhe balta, kanë shprehur falënderimet dhe mirënjohjen e tyre për Komunitetin Mysliman të Shqipërisë që iu gjend pranë në këto ditë të vështira të këtij dimri.          

 V. Mehmeti