Paraditën e së enjtes, më 9 shkurt 2012, Myftinia Shkodër ka ndihmuar një familje të përfshirë nga zjarri në qytetin e Shkodrës. Ka qenë vetë Myftiu Imam Muhamed Sytari që ka vizituar familjen e z. Gëzim Rexha, shtëpia e të cilit është djegur para pak muajsh dhe tashmë jeton në një mjerim dhe skamje të madhe. Zotëria në fjalë jeton i vetëm, është i papunë dhe pa asnjë përkrahje a ndihmë sociale.
           
Pasi ka vizituar ambientet e shtëpisë në fjalë, Myftiu e ka ngushëlluar z. Rexha për fatkeqësinë dhe e ka ftuar të jetë durues dhe ta pranojë këtë sprovë me besim në Zotin, i cili nuk e braktis robin e Tij.
           
Para mediave të pranishme, Myftiu ka dhënë një mesazh solidarizimi me rastin në fjalë duke i bërë thirrje biznesmenëve dhe njerëzve me pushtet në Shkodër që ta kenë parasysh këtë rast dhe shumë të tjerë, që kanë nevojë për ndihmë dhe përkrahje.
           
Me rastin e kësaj vizite, Myftiu i ka dorëzuar z. Gëzim Rexha, një ndihmë ushqimore dhe një sasi të hollash, me të cilat Myftinia Shkodër shpreson se do të ndihmojë sadopak vështirësinë dhe situatën në të cilën ndodhet personi në fjalë.           

Nga ana e tij, edhe z. Gëzim Rexha ka shprehur mirënjohjen e tij për Myftininë Shkodër për ndihmën bujare në një moment shumë të vështirë të jetës së tij.