Pasdrekën e së dielës, më 5 shkurt 2012, Myftiu i Shkodrës Imam Muhamed Sytari, ka pritur në një takim pune Atashehun për Çështjet Fetare në Ambasadën e Republikës së Turqisë në Tiranë, z. Shaban Ishlek.
           
Gjatë këtij takimi, z. Ishlek i ka përcjellur Myftiut të Shkodrës, selamet dhe përshëndetjet e përzemërta të Myftiut të Iskenderunit, z. Hamdi Kavillioğlu, si dhe projektin për ndërtimin e xhamisë në fshatin Barbullush që do të ndërtohet me donacionet e Myftinisë së Iskenderunit, në kuadrin e binjakëzimit në mes të dy myftinive.
           
Pasi ka parë me vëmendje projektin dhe detajet e tij, Myftiu i Shkodrës ka falënderuar interesimin e z. Ishlek për Myftininë e Shkodrës dhe xhaminë në fjalë, si dhe ka vlerësuar se projekti i xhamisë së re në Barbullush është një dhuratë e çmuar në atmosferën e ngrohtë të përkujtimit të Lindjes së hz. Muhammedit (a.s).

Myftiu ka vlerësuar se projekti në fjalë i tejkalon përmasat e një xhamie të zakonshme, pasi është i pajisur me anekse shumë të domosdoshme për jetën fetare në zonën e Barbullushit.
           
Gjatë këtij takimi është folur edhe për disa projekte të reja të Myftinisë Shkodër dhe mundësitë e bashkëpunimit me institucionet islame në Turqi.           

Më herët, Atashehu turk ka vizituar edhe Panairin e Librit Islam në bibliotekën e Shkodrës, ku ka shprehur vlerësimet e tij për këtë traditë të re të Myftinisë Shkodër.