Ditën e dytë të Panairit të Librit Islam në Shkodër, më 5 shkurt 2012, është zhvilluar promovimi i librit-album: “Institucionet islame të Shkodrës”, me autorë Smajl Bala dhe Blendi Alushi.
           
Aktiviteti ishte pjesë e bashkëpunimit të Myftinisë Shkodër dhe Shtëpisë botuese të Institutit Shqiptar të Mendimit dhe Qytetërimit Islam (AIITC), me qendër në Tiranë.
           
Në fjalën e tij para të pranishëmve, Myftiu i Shkodrës Imam Muhamed Sytari ka vlerësuar këtë botim të mbështetur nga AIITC, duke vënë në dukje se nxjerrja në pah e vlerave dhe gjurmëve të hoxhallarëve të Shkodrës është një punë e vështirë dhe një kontribut i vyer për traditën dhe kulturën e qytetit tonë. Ai ka shprehur mirënjohje për autorët, për mundin dhe përpjekjet për të bërë më të mirën në këtë libër-album.
           
Më pas, nëndrejtori i AIITC, z. Bedri Telegrafi ka folur mbi rëndësinë që botimi i librave që flasin dhe nxjerrin në pah kontributin e hoxhallarëve shqiptarë në mbrojtjen e interesave islame dhe ato kombëtare. Ai ka përmendur shumë prej hoxhallarëve shkodranë të përmendur në këtë botim të ri, duke shprehur vlerësim dhe mirënjohje për gjurmët e lënë prej tyre. Njëkohësisht ai ka falënderuar edhe autorët për punën dhe kontributin e dhënë me anë të këtij albumi.
           
Kanë përshëndetur aktivitetin edhe z. Muamer Vuci, H. Fejzi Zaganjori dhe nën/kryetari i Bashkisë Shkodër, z. Ridvan Trashani, të cilët kanë dhënë mendimet e tyre për albumin në fjalë.
           
Në fund, autorët kanë shprehur vlerësimet e tyre për këtë aktivitet, nevojën e këtij botimi dhe mirënjohjen e thellë për botuesin.           

Në emër të AIITC, nën/drejtori, z. Bedri Telegrafi i ka dhuruar bibliotekës së qytetit Shkodër disa nga botimet më të spikatura të realizuara nga Instituti Shqiptar i Mendimit dhe Qytetërimit Islam.