E xhumaja e datës 3 shkurt 2012, ndonëse një ditë e ftohtë me dëborë e shi, ka mbledhur me qindra besimtarë në xhaminë e Parrucës, për të kryer ritet e namazit të javës dhe për të dëgjuar hytben në prag të Mevludit Sherifë.
Nëpërmjet minberit të kësaj xhamie, Myftiu Imam Muhamed Sytari ka përhajruar të pranishmit për këtë natë të madhe dhe përkujtimin e ngjarjes së shënuar të lindjes së begatë të hz. Muhammedit (a.s).

Pasi e ka falënderuar All-llahun për mirësinë e të qenurit pjesë e ymmetit të hz. Muhammedit (a.s), Myftiu ka konstatuar se misioni me të cilin u dërgua profeti i fundit i All-llahut, mund të përkufizohet shumë mirë në hadithin e shtatë lloje njerëzish, të cilët do të jenë nën hijen e Arshit në ditën e kijametit.

“Prijësi i drejtë, i riu i lidhur pas adhurimit të All-llahut, dy persona që duhen vetëm për hir të All-llahut, një person i lidhur ngusht me xhaminë dhe faljen e namazit, një person që ftohet drejt imoralitetit dhe thotë: “Unë e kam frikë All-llahun”, një person që jep sadeka në fshehtësi, pa e ditur e majta atë që dha e djathta dhe ai që përkujton mirësitë e shumta të All-llahut, por edhe gjynahet që ai bën në hak të Tij dhe qan nga frika – janë shtatë llojet e njerëzve që do ta meritojnë këtë mirësi të madhe në ditën e kijametit”- ka përmendur Myftiu.

Në hytben e tij ai ka ftuar besimtarët që të bëhen pjesë e aktiviteteve të ndryshme që do të zhvillojë Myftinia Shkodër me këtë rast, duke nisur me Panairin e Librit Islam në Shkodër, që do të zhvillohet për dy ditë, të shtunën dhe të dielën, më 4-5 shkurt 2012, nga ora: 9.00-17.00, ceremoninë tradicionale të Mevludit, që do të zhvillohet ditën e nesërme, më 4 shkurt 2012 në orën 12.00 në xhaminë e Parrucës etj.

Një kronikë mbi hytben e kësaj xhumaje është transmetuar edhe në edicionet e lajmeve të televizioneve lokale të Shkodrës.