Pasditën e së martës, më 31 janar 2012, Myftiu Imam Muhamed Sytari ka pritur në një takim të përzemërt përfaqësuesit e Shtëpisë botuese “Logos-A”, nga Shkupi, Zekerija Ibrahimi dhe Afrim Gashi.
           
Gjatë këtij takimi është diskutuar mbi iniciativën më të re të Myftinisë Shkodër për organizimin e panairit të parë të librit islam në Shkodër, në kuadër të përkujtimit të Lindjes së Begatë të hz. Muhammedit (a.s).
           
Përfaqësuesit e Shtëpisë botuese “Logos-A”, pasi kanë falënderuar këtë nismë të Myftinisë Shkodër për zhvillimin e panairit të parë të librit islam në qytetin e Shkodrës, kanë shprehur kënaqësinë e tyre për të marrë pjesë në këtë panair. Ata i kanë dorëzuar Myftiut listën me më shumë se 130 tituj librash në sfera të ndryshme të shkencave dhe diturive islame, nga botimet e kësaj shtëpie botuese, me të cilët do të përfaqësohet në këtë panair. Ata kanë theksuar se këto aktivitete janë shumë të rëndësishme në kuadër të dobisë së madhe që sjellin në shoqëri, nëpërmjet përhapjes së librit.           

Ndërkohë Myftiu theksuar se botimet janë shumë të rëndësishme për jetën e muslimanëve dhe se lidhja e tyre me librin është shumë e veçantë, duke pasur parasysh faktet e ndryshme historike që nuk mund ta përfytyrojnë muslimanin larg dijes, librit, botimeve. Njëkohësisht, është lutur që ky panair të jetë sa më i suksesshëm për të gjitha shtëpitë botuese pjesëmarrëse dhe për vizitorët e tij.