Pasdrekën e së xhumasë, më 20 janar 2012, Myftiu Imam Muhamed Sytari ka pritur në një takim pune një delegacion nga Bashkësia Islame e Kosovës, e kryesuar nga Drejtori për Diasporën në BIK, z. Ekrem Simnica dhe Kryetari i Këshillit të Bashkësisë Islame të Prishtinës, z. Bahri ef. Sejdiu.
           
Gjatë këtij takimi të përzemërt është diskutuar për situatën aktuale të aktivitetit të ndërsjellët si dhe përpjekjet për harmonizimin e bashkëpunimeve dypalëshe.
           
Vëllezërit nga Kosova kanë shprehur solidarizimin e tyre me fatkeqësitë që përfshinë disa xhami të Shkodrës me rastin e përmbytjeve të vjetshme, si dhe me rastin e xhamisë së fshatit Mes-Myselim, që po ndërtohet rishtas, pas zjarrit që e rrafshoi në muajin maj 2010. Me këtë rast ata i dorëzuan Myftiut të Shkodrës një kontribut të vyer të grumbulluar me këtë shkak nga besimtarët e xhamive të Kosovës.
           
Pasi i ka falënderuar për ndihmën dhe përkrahjen bujare, Myftiu ka theksuar se ky kontribut është një dëshmi e rëndësishme e bashkëpunimit institucional në mes të Bashkësisë Islame të Kosovës dhe Myftinisë Shkodër, si dhe një vlerë e rëndësishme që karakterizon muslimanët shqiptarë në solidarizimin e tyre për nevojat e njëri-tjetrit.
           
Gjatë takimit është diskutuar edhe për botimet dhe nevojën e shtimit të tyre në funksion të rritjes së cilësisë së botimeve islame në gjuhën shqipe dhe ngritjes së nivelit të bashkëpunimit të ndërsjellët në këtë drejtim.
           
Më pas, delegacioni nga Kosova, të shoqëruar edhe nga Myftiu dhe stafi i tij kanë bërë një vizitë në fshatin Mes-Myselim, ku kanë parë nga afër nivelin e punimeve për përfundimin e xhamisë së re të fshatit. Gjatë kësaj vizite, Myftiu i ka vënë në dijeni vizitorët se kjo xhami ka nisur të ndërtohet me kontribute të sinqerta vullnetare të besimtarëve të Shkodrës, në një moment shumë të vështirë për Myftininë dhe besimtarët e kësaj zone. Sot, falë Zotit, xhamia është në përfundim e sipër dhe do të jetë një dëshmi e gjallë e bamirësisë, solidarizimit dhe bashkëpunimit të muslimanëve shqiptarë në rrugën e ngritjes së shtëpive të All-llahut në këtë tokë.           

Për nder të vëllezërve nga Kosova, Myftiu ka shtruar një drekë, gjatë së cilës janë këmbyer biseda të ndryshme rreth frymës së bashkëpunimit, zhvillimeve të fundit në tokat shqiptare dhe nevojën e madhe të bashkimit të fjalës për vepra të rëndësishme në shërbim të interesit fetar dhe atij kombëtar.