Paraditën e së hënës, më 16 janar 2012, Myftiu i Shkodrës Imam Muhamed Sytari ka inspektuar në terren, përfundimin e një faze të rëndësishme meremetimesh në xhaminë e fshatit Shtoj i Vjetër.

Që nga muaji i kaluar, imami i xhamisë, këshilli dhe xhemati i kësaj xhamie u ankuan në Myftininë Shkodër për amortizimin e dritareve të kësaj xhamie dhe domosdoshmërinë e disa ndërhyrjeve në objektin e saj.

Duke e konsideruar si të domosdoshme ndërhyrjen, Myftinia investoi për riparimin e dëmeve, meremetimin e dritareve dhe rregullimin e pamjes së jashtme dhe të brendshme të kësaj xhamie.

Sot, ndonëse një ditë e ftohtë në Shkodër, ambienti brenda xhamisë së fshatit Shtoj i Vjetër ishte më i ngrohtë se më parë. Gjithandej dukeshin gjurmët e punës dhe përfshirjes së besimtarëve në lyerjen e objektit, sistemimin e xhamisë dhe përgatitjen për të pritur ditën e xhuma, me një pamje të re, më tërheqëse dhe më pranë dëshirës së besimtarëve.

Me këtë rast, Myftinia Shkodër falënderon të gjithë besimtarët e përfshirë në këtë vepër të mirë të përbashkët për sistemimin dhe zbukurimin e ambienteve të xhamisë së fshatit Shtoj i Vjetër.