Nëpërmjet hytbes së xhumasë, më 13 janar 2012, të mbajtur në xhaminë e Plumbit, Myftiu i Shkodrës, Imam Muhamed Sytari ka lajmëruar se ditën e shtunë, më 4 shkurt 2012, mbarë bota islame përkujton ditën e 12-të të pranverës së parë, ndryshe muaji i lindjes së hz. Muhammedit (a.s).
           
Me këtë rast, Myftiu ka nisur të flasë për ndjenjën e krenarisë dhe mburrjes që duhet të ndjejë çdo musliman në botë, për faktin e qënies pasues i hz. Muhammedit (a.s) dhe ndjekës dhe besimtar në misionin me të cilin u dërgua si mëshirë për mbarë botërat.
           
Në hytben e tij, Myftiu ka theksuar se: “Nëse bota mburren me të mëdhenj, me të ditur e njerëz me pozita, ne mburremi që jemi pasuesit  e hz. Muhammedit (a.s), më të dashurit të krijesave të All-llahut, të fundit pejgamber, njeriut që nxori botën nga errësira në dritë, me udhëzimin e All-llahut!”.           

Gjatë hytbes së kësaj xhumaje, Myftiu ka shpjeguar edhe disa nga argumentet që vërtetojnë madhështinë e dërgesës profetike të hz. Muhammedit (a.s) dhe faktin e dërgesës së tij mëshirë për botërat, garanci dhe siguri hyjnore për ymetin e tij.