Paraditën e së enjtes, më 12 janar 2012, Myftiu i Shkodrës Imam Muhamed Sytari, i shoqëruar edhe nga menaxheri i pronave të Myftinisë, z. Blendi Alushi, ka inspektuar varrezën e vjetër mbi kodrën e lagjes “Liria”.

Ndonëse në një terren shumë të vështirë, vakëfi në fjalë, gjendet në mes të ish- Shtëpisë së Pritjes dhe kalasë Rozafa. Kjo pronë vakëf, rreth 24 mijë metër katror, ka në përbërje të saj varre të shumta të muslimanëve të 200 viteve të fundit të kësaj zone.

Ndonëse, pjesa dërrmuese e këtyre varreve janë mbuluar nga shkurret, ferrat dhe bimët e tjera të egra dhe ndodhet në një terren të pjerrët shumë të vështirë për t’u eksploruar, ato vazhdojnë të jenë dëshmitarë të një tradite dhe kulture të vjetër islame të qytetit të Shkodrës dhe të lagjeve përreth saj.

Nga inspektimet e bëra ditën e sotme, janë gjetur varre të ndryshme, gurët e të cilëve dëshmojnë se në këtë zonë janë varrosur hoxhallarë, drejtues ushtarakë, fëmijë etj.

Nëpërmjet këtyre inspektimeve, Myftinia Shkodër ka për qëllim të nxisë nxjerrjen në pah të këtyre gjurmëve të trashëgimisë sonë islame dhe tërheqjen e vëmendjes së masës islame të Shkodrës drejt ringjalljes së traditave të vjetra në raport me varrosjen e të vdekurve muslimanë dhe largimin nga risitë e kohës, që nuk kanë asnjë lidhje me vlerat islame dhe traditat tona.