Paraditën e së mërkures, më 11 janar 2012, Myftiu i Shkodrës, Imam Muhamed Sytari, i shoqëruar edhe nga menaxheri i pronave të Myftinisë Shkodër, z. Blendi Alushi, ka inspektuar gjendjen e aktuale e të Varrezave Komane, të njohura në Shkodër si: “vorret muslimane”.
           
Pas ndërhyrjeve konkrete për pastrimin e territorit që Myftinia bëri disa muajve më parë, sipërfaqja e kësaj varreze të vjetër është pastruar nga shkurret e shumta dhe bimët e egra që ia kishin marrë frymën dhe ia kishin zënë pamjen.  

Tashmë, para syve të krejt kalimtarëve, por edhe të vizitorëve të ndryshëm, paraqitet një sipërfaqe e madhe prej rreth 26 mijë metër katror, në të cilën janë shpërndarë varre të ndryshme, në të cilat pushojnë muslimanët shkodranë të 200 viteve të fundit.
           
Gjatë këtij inspektimi, Myftiu ka evidentuar disa varreza, të cilat i ka konsideruar si të veçanta, përsa i përket moshës së tyre, shënimeve, epitafeve dhe llojit të gurëve, që janë vendosur mbi ta.           

Myftinia Shkodër po studion mënyrën më të mirë të shfrytëzimit të kësaj varreze dhe evidentimin e gjurmëve që i përkasin trashëgimisë islame të Shkodrës dhe përtej saj në mesin e tyre.