Paraditën e së martës, më 10 janar 2012, Myftiu i Shkodrës, Imam Muhamed Sytari ka zhvilluar një vizitë pune në zyrën e Kryetarit të Bashkisë Shkodër, z. Lorenc Luka.
           
Pasi i ka uruar mirëseardhjen Myftiut, Kryetari i Bashkisë Shkodër ka uruar që viti 2012 të jetë një vit i mbarë për Shkodrën dhe institucionet e saj, për komunitetin dhe projektet e shumta që ai pret të realizohen.  
Kryetari i Bashkisë Shkodër, ka falënderuar edhe rolin e madh të komuniteteve fetare dhe Myftinisë Shkodër në drejtim të kultivimit të frymës së harmonisë, mirëkuptimit dhe vlerave shpirtërore që ato përcjellin në komunitet.
           
Nga ana e tij, Myftiu i Shkodrës, pasi e ka falënderuar Kryetarin e Bashkisë për mikpritjen, i ka uruar atij një vit të mbarë në realizimin e projekteve të shumta në rrugën e rimëkëmbjes dhe gjallërimit të jetës në Shkodër. Ai ka theksuar se pjesë e këtyre projekteve gjallëruese të jetës ekonomike, kulturore e fetare të qytetit janë edhe disa nga projektet e Myftinisë Shkodër, që kanë gjetur mbështetje dhe bashkëpunim nga Bashkia Shkodër.
           
Më pas, biseda është përqendruar te problematika e vakëfeve të Myftinisë Shkodër dhe domosdoshmëria e bashkëpunimit ndërinstitucional për zgjidhjen e shumë prej ngërçeve që pengojnë zhvillimin e pasurive të Myftinisë Shkodër.           

Me rastin e kësaj vizite, Myftiu i ka dhuruar Kryetarit të Bashkisë Shkodër, z. Lorenc Luka, kolanën me veprën e plotë në gjuhën shqipe të dijetarit të shquar islam me prejardhje nga Shkodra, Imam Vehbi Ismaili. Gjatë dhurimit, Myftiu ka theksuar se Shkodra duhet të ndjehet krenare që nga gjiri i saj kanë dalë dijetarë dhe shkollarë të afirmuar në botë si Imam Vehbi Ismaili, vepra e të cilit është botuar e plotë dhe tashmë mund të shfletohet për të marrë dritën e saj.