Paraditën e së enjtes, më 5 dhjetor 2012, Myftiu i Shkodrës Imam Muhamed Sytari, ka zhvilluar një inspektim në xhamitë e dy fshatrave; Mes-Myselim dhe Shtoj i Vjetër.
           
Fillimisht, në fshatin Mes-Myselim, Myftiu është interesuar për të parë nga afër nivelin e punimeve për ndërtimin e xhamisë së re. I shoqëruar edhe nga administratori i Myftinisë, menaxheri i pronave të saj dhe imami i kësaj xhamie, teologu Altin Nikshiqi, Myftiu ka konstatuar një ecuri të dukshme dhe të kënaqshme të punimeve që po bëhen prej një viti në këtë xhami të re.
           
Me këtë rast Myftiu ka shprehur kënaqësinë e tij për këtë arritje dhe ka nxitur ecurinë e mëtejshme, duke pohuar se koha është shumë e çmuar dhe se detyra e Myftinisë dhe e ndërtuesve është që ta përfundojnë sa më parë këtë xhami të re për besimtarët e shumtë të kësaj zone që e presin me padurim këtë faltore të re dhe plot dritë në fshatin e tyre.
           
Më pas Myftiu dhe stafi i tij, kanë inspektuar punimet për meremetimin e xhamisë në fshatin Shtoj i Vjetër. Janë vëzhguar prej afër punimet për meremetimin e dritareve të xhamisë, si dhe janë dhënë udhëzime konkrete në terren për disa ndërhyrje të domosdoshme për komoditetin e besimtarëve frekuentues të kësaj xhamie.
           
Myftiu ka falënderuar edhe angazhimin e imamit të xhamisë së fshatit Shtoj i Vjetër, teologut Ervil Kuçi, i cili po angazhohet maksimalisht për të shërbyer në këtë xhami, duke afruar të rinjtë dhe duke u bërë një shembull i mirë i përkushtimit dhe i shërbimit në rrugë të lartësimit të fesë së All-llahut.
 

Altin Nikshiqi
Imam, Mes-Myselim