Tashmë është realitet! Duke nisur nga e xhumaja e fundit e vitit 2011, dy xhamitë kryesore të Shkodrës do të kenë nga dy imamë. Këtë lajm e ka bërë publik Myftiu Imam Muhamed Sytari, në takimin e zhvilluar paraditën e së shtunës, më 31 dhjetor 2011, me katër imamët e dy xhamive kryesore të qytetit.
           
Në këtë takim, Myftiu u ka komunikuar imamëve, vendimin e Kryesisë së Komunitetit Mysliman të Shqipërisë, i cila ka miratuar kërkesën e Myftinisë Shkodër për të pajisur secilën nga dy xhamitë kryesore të qytetit; atë “Ebu Bekër” dhe atë të Parrucës, me nga dy imamë.
           
Kështu, duke nisur nga dita e xhuma, më 30 dhjetor 2011, xhamia “Ebu Bekër” do të ketë si imamë të saj, teologët: Idmir Plaku dhe Gilman Kazazi. Ndërkohë, po nga ajo datë, xhamia e Parrucës do të ketë si imamë të saj, teologët: Durim Kasemi dhe Naim Drijaj.
           
Gjatë takimit të zhvilluar në Myftininë Shkodër, Myftiu ka shpjeguar se qëllimi i kësaj lëvizje, është rritja e aktivitetit fetar në dy xhamitë kryesore, zhvillimi i mëtejshëm i mendimit teologjik, shtimi i vaseve, kurseve fetare dhe rritja e cilësisë së predikimit në to. Myftiu ka theksuar se kjo lëvizje, mbi të gjitha ka një dobi të madhe për komunitetin besimtar, si dhe do të garantojë cilësi më të mirë në shërbimet fetare për frekuentuesit e dy xhamive kryesore të qytetit.           

Më pas, biseda është përqendruar te disa detaje të punës së përbashkët të imamëve në xhami, si dhe është bërë një lutje për mbarëvajtjen e punës së imamëve të këtyre dy xhamive.