Paraditën e së mërkures, më 28 dhjetor 2011, Myftinia Shkodër ka organizuar një aktivitet letraro-artistik me fëmijët e kopshteve dhe kurseve të ndryshme fetare.
           
Aktiviteti ka pasur në qendër të tij recitime të shumta, përrallën e shoqëruar me shfaqje në videoprojektor dhe pyetje-përgjigje të ndryshme rreth botës së fëmijës dhe kurioziteteve që ngacmojnë mendjen e tyre. Përgjigjet e larmishme, ishin pa dyshim një pjesë e spikatur, sidomos për shkakun se ato shoqëroheshin me vargje të përzgjedhura nga krijimtaria e shkrimtarit për fëmijë, Xhahid Bushati.
           
Me shumë duartrokitje dhe buzëqeshje, janë pritur recitimet dhe interpretimet e bukura nga fëmijët, që i kanë dhënë dritë dhe atmosferë besimi dhe dije sallës së konferencave pranë Medresesë “Haxhi Sheh Shamia”.
           
Edhe prindërit dhe gjyshërit e pranishëm, janë kënaqur dhe emocionuar duke parë interpretimet e fëmijëve të tyre, recitimet plot talent dhe dialogjet plot urtësi.
           
Në një moment të këtij aktiviteti, ka përshëndetur edhe shkrimtari për fëmijë, Xhahid Bushati, i cili pasi ka falënderuar organizatorët për këtë shfaqje plot vlera dhe dashuri, ka uruar që drita e dijes dhe e besimit t’i udhëheqë këta fëmijë në jetë. Ai ka dhënë disa këshilla të vlefshme, që fëmijët të jenë miq të librit, ta lexojnë atë dhe të përfitojnë prej tij.
           
Në fund të aktivitetit, fëmijëve ju është dhuruar libri për fëmijë “Katër pyetje erës”, i shkrimtarit Xhahid Bushati.           

Myftinia Shkodër shpreh falënderimet e saj dhe mirënjohjen e thellë për punën plot përkushtim të edukatores Valbona Molla (Halili), si dhe për krejt fëmijët që morën pjesë në këtë shfaqje me vlerë, me interpretimet e bukura dhe plot emocion.