Paraditën e së mërkures, më 21 dhjetor 2011, Myftiu i Shkodrës Imam Muhamed Sytari ka pritur në një takim të përzemërt Atashehun për Çështjet Fetare në Ambasadën e Turqisë në Tiranë, z. Shaban Ishlek.
           
Në qendër të këtij takimi ka qenë biseda rreth çështjes së ndërtimit të xhamisë së re në fshatin Barbullush, me fondet e Myftinisë së Iskenderunit.
Atashehu turk e ka vënë në dijeni Myftiun se shumë shpejt do të nisin procedurat për fillimin e fazës së parë për ndërtimin e xhamisë së re në fshatin Barbullush. Ai ka sqaruar se Myftinia e Iskenderunit është angazhuar maksimalisht për ta sponsorizuar këtë xhami, në kuadër të binjakëzimit me Myftininë e Shkodrës.

Nga ana e tij, Myftiu Imam Muhamed Sytari, pasi e ka falënderuar z. Shaban Ishlek për interesimin e tij në lidhje me këtë çështje, ka pohuar se gjatë vizitës së përbashkët të bërë në Iskenderun, në fillim të muajit dhjetor 2011, ka parë nga afër interesimin e madh të Myftinisë së Iskenderunit dhe të Myftiut H. Hamdi Kavillioğlu për mbledhjen e fondeve të mjaftueshme për ndërtimin e kësaj xhamie të shumëpritur për besimtarët e fshatit Barbullush dhe Myftininë Shkodër.

Më pas është folur edhe për rritjen e bashkëpunimit të Myftinisë Shkodër me myftini të tjera të vendit mik, në kuadër të marrëdhënieve të shkëlqyera që Komuniteti Mysliman i Shqipërisë ka me Dijanetin e Turqisë.

Myftiu ka theksuar gjithashtu se në Shkodër janë disa shoqata bamirëse turke, që kontribuojnë në mënyrë të dukshme për rritjen e imazhit të fesë islame dhe afrimin e rinisë shkodrane drejt mësimeve të kësaj feje.Ai ka pohuar se ndjehet krenar që me kërkesën e Myftinisë që ai drejton, i është propozuar Këshillit të Bashkisë Shkodër dhënia e titullit “Qytetar Nderi” i Shkodrës, dijetarit të shquar turk Osman Nuri Topbash, më 31 maj 2010.