Paraditën e së shtunës, më 10 dhjetor 2011, Myftinia Shkodër ka organizuar promovimin e librit: “Themelet e një Medreseje” të autorëve Eljaz Kraja dhe Ahmet Osja.

Në referatin e tij: “Vlera dhe dëshmi nga një libër që nxit respekt”, Myftiu Imam Muhamed Sytari ka theksuar se: “Në rreshtat e tij lexohet pastër një histori e thjeshtë, por shumë reale, e përpjekjeve, peripecive, shpirtit të sakrificës dhe vullnetit për të ngritur në këmbë një institucion të vërtetë arsimor të tipit medrese, në vite të vështira e pa përkrahje. Aty, lexohet qartas, mrekullia e Zotit në këtë vend e në bijtë e tij, që edhe pse ia sollën shpinën duke bërtitur me zë të lartë kundër Tij, All-llahu bëri që nga mesi i tyre të ringjallej shpresa e vijimit në rrugën e baballarëve, brezave të nderuar të këtij qyteti që jetuan, punuan dhe u larguan nga kjo botë me besimin e patundur në Njësinë e All-llahut! Aty, qëndrojnë dukshëm përpjekjet dhe ropatjet për të ndërtuar një shkollë vlerash, me duar shqiptare, plot besim, kulturë dhe dije! Ndoshta, sot më shumë se kurrë, duhet të kthejmë kokën pas dhe të kuptojmë se sekreti i mbarësisë dhe i suksesit të kësaj shkolle, që vazhdoi të shumëzohej vit pas viti, qëndronte në thjeshtësinë dhe sinqeritetin e atyre dhjetra burra e gra, që morën mbi supe një mision sa të vështirë, aq edhe të shenjtë: dritësimin e së ardhmes shqiptare për bijtë e kësaj toke besimtare dhe thellësisht islame! Unë jam krenar të pohoj sot, se nga brumi i medresesë së Shkodrës, morën nxitjen për të ecur përpara në rrugën e specializimit në shkencat teologjike, shkencore e sociale me dhjetra djem e vajza e shumë të tjerë që vazhdojnë të gëzojnë edhe sot pozita drejtuese në institucione të ndryshme të Shkodrës dhe përtej saj.”
     
Ndërsa teologu Altin Loshi, në referatin e tij: “Mbresa dhe kujtime nga koha e medresesë”, ka theksuar se: “Medreseja “Haxhi Sheh Shamia” u bë dëshmitare e një vullneti të patundur të dëshirës për të jetuar me besim dhe përkushtim në jetë. Nëse Medreseja Nizamije e Bagdadit i parapriu krijimit të universiteteve më të mira të Evropës, edhe medreseja e Shkodrës u bë nxitëse që edhe në qytete të tjera të Shqipërisë të hapen medrese të reja, rreth së cilave u mblodhën nxënës me dëshirën e madhe për të mësuar dije dhe moral të pastër islam”.
     
Aktivitetin e ka përshëndetur studiuesi Nexhmi Bushati, i cili ka dhënë edhe disa vlerësime dhe kujtime për mikun e tij, autorin e librit, z. Eljaz Kraja, që nuk jeton më.
           
Me ftesë të z. Ahmet Osja, në këtë aktivitet kishin ardhur edhe Myftiu i Dibrës së Madhe, z. Ruzhdi Lata, Myftiu i Tetovës, z. Alifekri Esati, miq të autorëve nga Tirana etj, të cilët kanë përshëndetur aktivitetin duke uruar suksese dhe mbarësi për daljen e librit dhe vlerat që ai përcjell te lexuesit.
           
Ka përshëndetur edhe z. Omer Kajoshi nga Mali i Zi, ish-nxënës i Medresesë “Haxhi Sheh Shamia” dhe pjesë e gjeneratës së parë të diplomuar prej saj, sot drejtor i Medresesë së Tuzit.
           
Në fund, z. Ahmet Osja ka mbajtur fjalën e rastit në emër të autorëve, ku ka hedhur dritë mbi qëllimin e librit dhe ka dhënë mendimet e tij për fillimin e punës në Medresenë “Haxhi Sheh Shamia”.           

Ndërkohë, Myftinia ka organizuar edhe një koktejl për të ftuarit, sikurse është bërë edhe shpërndarja e librit për pjesëmarrësit në aktivitet.