Një ekspozitë fotografike u çel ditën e enjte, më 8 dhjetor 2011 me rastin e 20 vjetorit të Medresesë “Haxhi Sheh Shamia”, në qytetin e Shkodrës.

Ekspozita që u hap në ambientet e bibliotekës së qytetit, “Marin Barleti”, kishte për qëllim të shfaqte për vizitorët momente të spikatura nga aktiviteti 20 vjeçar i kësaj shkolle elitare në qytetin e Shkodrës. Aty, ishin vendosur stenda me fotografi të ndryshme që prezantojnë aktivitete, veprimtari, drejtues të shkollës, mësues e nxënës, në momentet më të bukura të jetës së kësaj medreseje.

Aktiviteti është përshëndetur nga drejtori i Medresesë, z. Kujtim Dervishi, i cili ka vlerësuar punën dhe sakrificën e të gjithë drejtuesve dhe mësuesve që kontribuan për këtë shkollë deri në këtë ditë.

Në emër të Myftinisë Shkodër ka përshëndetur përgjegjës i sektorit të arsimit, teologu Arben Halluni, i cili ka vlerësuar se Medreseja është një vatër e shëndoshë e edukimit dhe e brumosjes së brezave me dije, edukatë fetare dhe kulturë besimi.

Ekspozita do të qëndrojë e hapur për vizitorët deri në fund të kësaj jave, ndërkohë që aktivitetet kushtuar 20 vjetorit të Medresesë “Haxhi Sheh Shamia”, do të vijojnë edhe me mbrëmjen jubilare që do të zhvillohet të hënën më 12 dhjetor 2011 në teatrin “Migjeni” të Shkodrës.

Njëkohësisht, ditën e shtunë, më 10 dhjetor 2011, Myftinia Shkodër organizon promovimin e një libri kushtuar themelimit të Medresesë “Haxhi Sheh Shamia”.