Paraditën e së mërkurës, më 23 nëntor 2011, Myftiu i Shkodrës Imam Muhamed Sytari ka pritur në një vizitë pune, drejtorin për Ballkanin e Vakëfit Islam Turk, z. Faruk Gaye, shoqëruar nga imami i Qendres Islame të Bushatit, Hafiz Shukri Kapllan.
           
Pasi i ka uruar mirëseardhjen në Shkodër, Myftiu e ka informuar drejtorin Gaye për aktivitetin e deritanishëm të Myftinisë Shkodër, si në aspektin kulturor, fetar e human. Ai e ka njohur mikun nga Turqia se Myftinia Shkodër po punon dita-ditës për të konsoliduar pozitën e saj si një institucion me rëndësi të veçantë në Shkodër.

Myftiu ka theksuar gjithashtu se të gjitha shoqatat dhe fondacionet bamirëse që vijnë në Shkodër, janë të mirëpritur për ta ushtruar aktivitetin e tyre në bashkëpunim me Myftininë dhe në bashkërendim me projektet e saj dhe misionin e madh në shërbim të fesë islame. Ai ka përmendur se megjithëse ka raste kur shoqata të caktuara mund të devijojnë nga ky parim, detyra e jonë është të ruajmë frymën e harmonisë dhe të bashkëpunimit në shërbim të interesave të larta.

Myftiu ka falënderuar rolin që Vakëfi Islam Shqiptaro-Turk, po jep në Shkodër, nëpërmjet aktivitetit të tij të larmishëm, sidomos në edukimin e brezit të ri me dashurinë për Kur’anin dhe dijen në përgjithësi.
           
Nga ana e tij, drejtori për Ballkanin i Vakëfit Islam Turk, z. Faruk Gaye, ka shprehur kënaqësinë e kësaj vizite dhe ka uruar suksese dhe mbarësi për Myftininë Shkodër. Ai ka theksuar se bashkëpunimi në mes të dy institucioneve do të vazhdojë, me qëllim që kontributi që ky Vakëf Islam jep në mbi 140 shtete të botës të jetë përherë e më evident në Shkodër.           

Më pas biseda vëllazërore ka vijuar duke u përqendruar në aktivitetet dhe projektet e Myftinisë Shkodër dhe domosdoshmërinë e rritjes së bashkëpunimit dypalësh.