Ditën e mërkure, më 16 nëntor 2011, në kuadër të përkujtimit të 21 vjetorit të rihapjes së xhamisë së Plumbit, Myftinia Shkodër ka organizuar një sërë aktivitetesh fetare për të mbajtur të gjallë në memorien e besimtarëve këtë ditë të shënuar.

Aktivitetet e kësaj dite kanë nisur me pritjen e haxhilerëve, në oborrin e xhamisë së Parrucës. Më pas, Myftinia ka organizuar faljen e namazit të iqindisë në xhaminë e Plumbit. Me këtë rast, janë mbajtur fjalime përkujtimore dhe është bërë një lutje në nder të besimit dhe lirisë së tij. Me shumë emocion është ndjekur fjalimi i mbajtur në këtë xhami para 11 viteve nga i ndjeri Hafiz Sabri Koçi.

Ndërkohë, në mbrëmje, është zhvilluar një tryezë bashkëbisedimi me temë: “16 nёntor 2011 – 21 vite liri besimi”.

Aktiviteti që është zhvilluar nё sallёn e konferencave nё Grand Hotel Europa, ka nisur me referatin me temë: “16 nёntor 1990- njё ditё qё s’duhet harruar” mbajtur nga H. Mithat Myftija, imam i xhamisë së Plumbit. Gjatë fjalës së tij, z. Myftija ka kujtuar emocionet dhe peripecitë e ditëve të para të angazhimit të qytetarëvë shkodranë për rihapjene xhamisë së Plumbit.

Më pas ka referuar teologu Idmir Plaku, imam i xhamisë “Ebu Bekër”. Në referatin e tij me temë: “Liria e besimit dhe vlerёsimi i saj”, ai ka folur mbi rëndësinë dhe vlerën e lirisë së besimit dhe domosdoshmërinë e përfitimit nga kjo liri për ta praktikuar si duhet fenë dhe besimin.

Kanë përshëndetur edhe drejtori i Medresesë “Haxhi Shesh Shamia”, z. Kujtim Dervishi, imami i xhamisë së Rusit, H. Fejzi Zaganjori dhe Myftiu i Malësisë së Madhe, H. Edmir Smajlaj.

Aktiviteti ka vazhduar me fjalën e Myftiut të Shkodrës, Imam Muhamed Sytari, cili ka theksuar se kjo është dita e Hafiz Sabri Koçit, të cilën nuk duhet ta harrojmë, as ne as brezat që vijnë. Ai ka theksuar se detyra e jonë është të kujtojmë atë fjalim të mrekullueshëm të Hafizit të Shkodrës e të mbarë Shqipërisë, për të cilin do ta kujtonte me këto fjalë:  “Gëzimi më i madh imi ka qenë më 16 nëntor 1990... sikur linda përsëri. Kur shkova te xhamia, ç’të shihja? Ishte mbushur zi me njerëz. Vargu i tyre  zgjatej deri në kala. Altoparlantet rreth e përreth... Të gjithë filluan të bien tekbir. Brohoritnin. Masa gjithnjë e më tepër merrte flakë... Kam hipur në një tribunë të ngritur për atë qëllim. Mezi e përmbaja veten dhe s’mundja t’ju besoja syve të mi... S’kisha parë në jetën time aq të tubuar, mbi 55 mijë vetë... E pashë veten aq të lumtur, saqë nuk kisha gajle edhe sikur të bija edhe kurban. Nuk kishte gëzim më të madh për jetën!”.

Në fund, Myftiu ka bërë prezent projektet e reja për rehabilitimin e plotë të xhamisë së Plumbit, që do të financohen nga qeveria e Kuvajtit në bashkëpunim me qeverinë shqiptare dhe Bashkinë e Shkodrës.

Ahmed Mahiri