Ditën e mërkure, më 16 nëntor 2011, kanë mbërritur në Shkodër haxhilerët e këtij viti, që për 21 ditë kanë kryer në Meke dhe Medine ritualet e haxhit, një ndër pesë shtyllat e fesë islame.
           
Në pritje të haxhilerëve, në aeroportin e Rinasit, ka dalë Myftiu i Shkodrës Imam Muhamed Sytari, i cili pasi është takuar me vizitorët e Shtëpisë së Shenjtë dhe është interesuar për shëndetin dhe haxhin e tyre, i ka shoqëruar ata drejt Shkodrës.
           
Te xhamia e Parrucës, imamë, besimtarë dhe familjarë të shumtë kanë dalë për të pritur të dashurit e tyre. Me shumë emocion është përjetuar momenti i mbërritjes së autobuzit që i shoqëronte haxhilerët e dashur. Të rrethuar nga tekbiret e minareve të xhamisë Parrucë, ata kanë zbritur njëri pas tjetrit, duke u përqafuar me familjarët dhe imamët e xhamive.
           
Haxhilerët kanë dhënë edhe intervista të shumta për mediat e pranishme, që janë interesuar të marrin përshtypjet dhe emocionet e tyre të para pas mbërritjes në vendlindje. Edhe Myftiu i Shkodrës, ka deklaruar se: “Mbërritja e haxhilerëve të dashur në një ditë si kjo, në të cilën përkujtojmë 21 vjetorin e rihapjes së xhamisë së Plumbit, është një moment reflektimi për të kuptuar nevojën e madhe që ka njeriu për Zotin, në jetën e tij të përditshme”.
           
Ndërkohë, me hyrjen e kohës së mesditës, haxhilerët janë falur sëbashku me Myftiun dhe imamët e pranishëm, duke ndarë kënaqësinë e namazit të parë pas kthimit nga vendet e shenjta.
           
Në përfundim  të namazit të mesditës, Myftiu ka uruar edhe një herë kthimin shëndosh e mirë të haxhilerëve të këtij viti dhe është lutur që All-llahu t’ia ketë pranuar sakrificën dhe mundin e tyre në adhurimet e këtij rituali të shenjtë.
 

Il. Dizdari