Ditën e hënë, më 7 nëntor 2011, në atmosferën e begatë të Kurban Bajramit, Myftinia Shkodër ka bërë shpërndarjen e qindra pakove me mish për të varfër e nevojtarë të shumtë në qytetin e Shkodrës dhe në zonën e Postribës.
           
Një pjesë e veçantë e kësaj ndihme është ndarë edhe për Azilin e Pleqve dhe Jetimoren e qytetit të Shkodrës.
           
Në këtë aktivitet humanitar ka qenë i pranishëm edhe Myftiu i Shkodrës Imam Muhamed Sytari. Në një komunikim për mediat, me këtë rast, ai ka thënë se festa e Kurban Bajramit ka në thelb të saj edhe përcjelljen e mesazheve të humanizmit dhe përkrahjes ndaj shtresave në nevojë, e sidomos për të moshuarit azilantë dhe për fëmijët jetimë. Ai ka bërë thirrje që njerëzit e pasur dhe pushtetarët të drejtohen nga këto dy institucione për të dhënë një kontribut edhe më të madh, që atyre mos t’u mungojë dashuria, përkrahja e ndihma. Ai ka falënderuar njëkohësisht edhe drejtoreshën e Azilit të Pleqve, znj. Vildana Gushta dhe drejtorin e Jetimores, z. Arian Dushaj për angazhimin e tyre dhe përpjekjet që azilantët dhe jetimët të jetojnë në kushte sa më komode dhe në harmoni.
           
Myftiu ka uruar që ky Kurban Bajram të sjelle sadopak atmosferën e festës në dy institucionet e vizituara prej tij, në mënyrë që askush të mos përjashtohet nga vëmendja dhe përkujdesja në ditë të gëzueshme e të begata si ato të bajramit.
           
Nga ana e tyre edhe drejtuesit e dy institucioneve kanë falënderuar Myftiun e Shkodrës për këtë p��rkujdesje dhe për ndihmën bujare me rastin e Kurban Bajramit.
 

Al.Hoxha