Që në orët e para të mëngjesit të ditës së dielë, më 6 nëntor 2011, besimtarë të shumtë muslimanë janë tubuar në sheshin bri xhamisë “Ebu Bekër”, për të kryer së bashku ritualet e Kurban Bajramit.
           
Pas namazit të sabauht të drejtuar nga teologu Arben Halluni, në tribunë kanë dalë njëri pas tjetrit imamët e nderuar të xhamive: “Ebu Bekër”, Kiras, Perash dhe Parrucë, teologët: Idmir Plaku, Ylli Buraniqi, Adem Pizga dhe Naim Drijaj.
Në fjalët e tyre, ata kanë shpjeguar vlerat dhe mesazhet që përcjell dita e madhnueshme e Kurban Bajramit. Ata nuk kanë lënë pa përmendur edhe faktin se kjo ditë është një simbol i unitetit dhe i vëllazërisë së muslimanëve në mes vetes.
           
Në orën 7.00, bësimtarët janë bërë gati për të falur namazin e Kurban Bajramit nën drejtimin e Myftiut të Shkodrës Imam Muhamed Sytari. Pas përfundimit të namazit të Bajramit, i  shoqëruar nga tekbiret, Myftiu është ngjitur në minber, prej ku ka mbajtur edhe hytben e kësaj dite dhe urimet për mbarë besimtarët e pranishëm dhe të mbarë Shkodrës.
           
Në fjalën e tij, Myftiu ka bërë thirrje për të ndjekur frymën dhe shpirtin e kësaj dite të madhe, që rrezaton harmoni, vëllazëri dhe bashkëpunim të mëtejshëm në mesin e muslimanëve. Ai ka përmendur edhe faktin se prej mirësive të All-llahut ndaj këtij popull është edhe vizita e përvitshme që muslimanët e Shkodrës dhe të mbarë Shqipërisë i bëjnë Qabes së Madhnueshme, duke dëshmuar besimin dhe përuljen e tyre ndaj All-llahut dhe thirrjes së Tij.
           
Myftiu është lutur që ditë më të mira dhe përparime të përhershme të ketë Shkodra, Shqipëria dhe mbarë ymeti islam.
Në përfundim të ceremonisë së faljës së Kurban Bajramit, besimtarët kanë këmbyer urimet dhe përshëndetjet e Kurban Bajramit me njëri-tjetrin, me emocionet e kësaj feste të gëzueshme.
           
Falja e Bajrameve në sheshin bri xhamisë “Ebu Bekër”, është kthyer tashmë në një traditë të bukur fetare, që spikat vit pas viti madhështinë e harmonisë së muslimanëve të Shkodrës, si një familje e begatë besimi!
 

V.Mehmeti